«Sirkulýar ykdysadyýete geçmegiň milli tejribesi» atly ylmy-tejribe maslahaty
2024-nji ýylyň 30-njy sentýabrynda Türkmenistanyň Daşary işler ministrliginiň Halkara gatnaşyklary institutynda «Sirkulýar ykdysadyýete geçmegiň milli tejribesi» atly ylmy-tejribe maslahaty geçirildi. Bu ylmy-tejribe maslahata Türkmenistanyň Maliýe we ykdysadyýet ministrliginiň wekilleri, şeýle-de Türkmen döwlet maliýe institutynyň, Türkmen döwlet ykdysadyýet we dolandyryş institutynyň, Türkmenistanyň Daşary işler ministrliginiň Halkara gatnaşyklary institutynyň professor˗mugallymlary, şeýle-de hem magistrler we talyplar gatnaşdylar.
Maslahatda çykyş edenler sirkulýar ykdysadyýete geçmegiň ähmiýeti barada gürrüň berdiler.
Gahryman Arkadagymyz we hormatly Prezidentimiz ýurdumyzyň ykdysadyýetini dünýäniň ösen döwletleriniň derejesine ýetirmegi, hem-de ilatyň ýaşaýyş-durmuş derejesini düýpli ýokarlandyrmagy baş maksat hökmünde kesgitleýärler.
2024-nji ýylyň fewralynda geçirilen Bütindünýä hökümet sammitinde türkmen wekiliýeti tarapyndan öňe sürlen teklipleriň arasynda 2030-njy ýyla çenli döwür üçin durnukly ösüşe gönükdirilen gün tertibiniň ileri tutulýan ugurlaryna esaslanyp, ýapyk aýlanyşykly, ýagny galyndysyz (sirkulýar) ykdysadyýete geçmek boýunça ählumumy Çarçuwaly maksatnamany işläp taýýarlamak teklip edildi.
Döwletimiziň durnukly ykdysady ösüşini üpjün etmäge gönükdirilen işler, aslynda, galyndysyz ykdysadyýetiň talaplaryna doly laýyk gelýär. Ykdysadyýetiň ähli pudaklaryna ekologik nukdaýnazardan has kämil tehnologiýalar ornaşdyrylýar. Gaýtadan dikeldilýän energiýa çeşmelerini ulanmak bilen bagly degişli innowasion tehnologiýalary işläp taýýarlamaga hem-de zyňyndylary azaltmaga aýratyn üns berilýär.
Ylmy-tejribe maslahatynyň ahyrynda oňa gatnaşyjylar sorag-jogap alyşdylar we halkara bilermenler sowallara anyk mysallaryň üsti bilen jogap berdiler.
Döwran DURDYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň IV ýyl talyby.