SANLY ULGAM ARKALY WEBINAR GEÇIRILDI
2025-nji ýylyň 20-nji maýynda Türkmenistanyň Daşary işler ministrliginiň
Halkara gatnaşyklary institutynyň guramagynda hemişelik Bitaraplygymyzyň
şanly 30 ýyllygy, şeýle hem BMG-niň Baş Assambleýasy tarapyndan 2025-nji
ýylyň «Halkara parahatçylyk we ynanyşmak ýyly» diýlip yglan edilmegi
mynasybetli webinar geçirildi. Türkmenistanyň Halkara parahatçylyk we
ynanyşmak ýylynyň dowamyndaky işleriniň we ileri tutýan ugurlarynyň
Konsepsiýasyna laýyklykda guralan webinara sanly ulgam arkaly ýurdumyzyň orta
hünär we ýokary okuw mekdeplerinden mugallymlardyr talyp ýaşlar gatnaşdylar.
Sanly ulgam arkaly geçirilen bu okuw sapagyny Türkmenistanyň Daşary işler
ministrliginiň Halkara gatnaşyklary institutynyň Žurnalistikanyň nazaryýeti we
amalyýeti kafedrasynyň uly mugallymy Jemile Pürjäýewa hem-de Halkara
ykdysady gatnaşyklary kafedrasynyň mugallymy Nazar Meredow bilelikde alyp
bardylar. Sapagyň dowamynda uly mugallym Jemile Pürjäýewa «Türkmenistanyň
parahatsöýüjilikli daşary syýasatyny wagyz etmekde Gahryman Arkadagymyzyň
interwýularynyň ähmiýeti», mugallym Nazar Meredow bolsa «Ten principles of
economics» atly temalar boýunça çykyş etdiler.
Çykyşlarda Türkmenistanyň parahatsöýüjilikli halkara gatnaşyklarynyň we
daşary syýasy başlangyçlarynyň meşhur halkara köpçülikleýin habar beriş
serişdeleriniň hem üns merkezindedigi aýratyn nygtaldy. Munuň özi dünýä
jemgyýetçiliginde uly gyzyklanma döredip, Türkmenistanyň halkara abraýynyň
barha artýandygyny aýdyň görkezýär. Şeýle hem halkara media giňişliginde
Bitarap Türkmenistanyň daşary syýasatyna we diplomatiýasyna üns berilmegi
türkmen halkynyň Milli Lideri Gahryman Arkadagymyzyň hem-de hormatly
Prezidentimiziň BMG-niň Baş Assambleýasynda we beýleki halkara guramalaryň
münberlerinde beýan edýän başlangyçlarynyň giň goldawa eýe bolýandygyna
aýratyn üns çekildi. Hususan-da, Milli Liderimiziň halkara media ulgamynyň
wekilleri bilen duşuşmagynyň we olaryň sowallaryna jogap bermeginiň, ýokary
derejeli duşuşyklaryň netijeleri boýunça metbugat beýannamalary bilen çykyş
etmeginiň ähmiýetine möhüm ornuň degişlidigi bellenildi.
Webinaryň dowamynda degişli temalar boýunça sowal-jogabyň alşylmagy
okuw sapagynyň täsirini has-da artdyrdy.
Şamuhammet ELÝASOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.