TDIM HGI-niň mugallymlary we talyplary “Hazar 2023: durnukly ösüş ýollary” atly III Halkara ylmy foruma gatnaşdylar
2023-nji ýylyň 29-31-nji maýynda Hazaryň Ylym we bilim kongresiniň çäginde “Hazar 2023: durnukly ösüş ýollary” atly III Halkara ylmy forum geçirildi. W.N Tatişewiň adyndaky Astrahan döwlet uniwersiteti forumyň esasy geçýän ýeri hökmünde hyzmat etdi. Ýokary derejeli geçirilen forum Hazar deňziniň arasyndaky hyzmatdaşlygy pugtalandyrmak, şeýle hem Hazarýaka döwletleriň arasynda ylym, bilim, medeniýet, innowasiýa boýunça hyzmatdaşlygy ösdürmek meselelerini ara alyp maslahatlaşmak üçin möhüm ähmiýetli ýere öwrüldi. Foruma Hazaryň öňdebaryjy uniwersitetleriniň rektorlary, Russiýa Ylymlar akademiýasynyň wekilleri, Hazarýaka döwletleriň Ylymlar akademiýalary, sebit we federal häkimiýetler, jemgyýetçilik guramalary we Hazaryň etno-medeni jemgyýetleri, GDA döwletleriniň işewür wekilleri, iş berijiler, şeýle hem ýokary we orta ýörite bilim edaralarynyň talyplary gatnaşdylar. Üç gün dowam eden bu halkara forumyň çäginde strategiki sessiýalar, çekişme panelleri, entografik olimpiada, Ygtyýarlylyk merkezleriniň bilermenler geňeşiniň ýygnagy, Hazar sebitiniň ýokary bilim edaralarynyň konsorsiumyň ulag we logistika pudagyndaky ýygnaklary geçirildi. Halkara forumyň ilkinji güni bütinleý ýaşlar syýasaty bilen baglanyşykly çäreleri öz içine aldy.
Bu giň gerimli foruma Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyplary hem gatnaşdylar. Halkara hukugy we deňeşdirme hukuk öwreniş kafedrasynyň mugallymy Ysmaýyl Ýakubow forumyň birinji gününde geçirilen “Halkara ýaşlaryň başlangyçlary” atly çekişmeler panelinde “Russiýa we Hazar ýurtlarynyň arasyndaky gatnaşyklary berkitmekde ýaşlaryň orny: ýaşlaryň hyzmatdaşlygynyň häzirki ýagdaýy we ösüş perspektiwalary” atly tema boýunça, Halkara gatnaşyklary fakultetiniň IV ýyl talyby Serdar Rahymow “Hazaryň makrosebitiniň jemgyýetçilik medeni howpsuzlygy” bölüminde “Arkadag Serdarly bagtyýar ýaşlar” atly tema boýunça, şeýle-de Halkara ykdysady gatnaşyklary fakultetiniň III ýyl talyby Rahmangylyç Annageldiýew “Türki halklarynyň we Russiýanyň bileleşigi” atly tema bilen çykyş etdiler. ADU-nyň Rektory Konstantin Markelowyň “Bu halkara forum geljekde Hazarýaka ýurtlarynyň arasynda ykdysady, ylym, bilim we ynsanperwer hyzmatdaşlygy ýola goýmakda dünýä we sebit derejesinde durnuklylygy gazanmakda öz mynasyp goşanyny goşar” diýip, mynasyp baha bermegi bilen forumyň ähmiýetini has-da ýokarlandyrdy.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
I ýyl talyby.