Peder pendi – nesillere ýörelge
2022-nji ýylyň 25-nji aprelinde Türkmenistanyň Daşary işler ministrliginiň Halkara gatnaşyklary institutynyň guramagynda Beýik Ýeňşiň 77 ýyllygy mynasybetli “Zenan mertebesiniň sarpalanýan jemgyýetiniň batly gadamlary” atly üme dessury boýunça duşuşyk geçirildi. Duşuşyga Türkmenistanyň Telekommunikasiýalar we informatika institutynyň, Ýagşygeldi Kakaýew adyndaky Halkara nebit we gaz uniwersitetiniň hem-de Aşgabat şäheriniň 25-nji orta mekdebiniň mugallymlary we mährem ene Sülgün Reýimowa gatnaşdylar.
Duşuşygyň dowamynda çykyş edenler halypa mugallymlaryň hem-de talyp gyzlaryň el işleri bilen meşgul bolmaklary halypa-şägirtlik ýoly bilen nesilden-nesle geçip gelýän el hünärlerimiziň geljekki nesillere dowamat-dowam boljakdygy barada aýtdylar. Çykyşlarda hormatly Arkadagymyzyň peşgeş beren kitaplaryndan getirilen jümleler duşuşygyň ähmiýetini has-da ýokarlandyrdy.
Ýerine ýetirilen aýdym-sazly çykyşlar bolsa üme dessury arkaly geçirilen duşuşyga gatnaşanlarda uly täsir galdyrdy.
Akgözel RASULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.