30/11/-0001
1218
Paýhas çeşmesi — edep terbiýäniň gözbaşy
2022-nji ýylyň 25-nji ýanwarynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň jemgyýetçilik guramalarynyň, žurnalistikanyň nazaryýeti we amalyýeti kafedrasynyň guramagynda talyp ýaşlaryň zyýanly endiklerden daşda durmaklaryny, sagdyn durmuş ýörelgelerine eýermeklerini ündemek maksady bilen «Paýhas çeşmesi — edep-terbiýäniň gözbaşy» atly wagyz-nesihat duşuşygy geçirildi.
Duşuşygyň dowamynda çykyş edenler ata-babalarymyzyň ak ýürekli zähmet çekip, halal ýaşamaklary barada goýup giden öwüt-ündewlerine, nakyllaryna, pähimlerine eýermegiň ýaşlarymyzyň baş borjy bolup durýandygyny nygtadylar.Olaryň aýtmaklaryna görä, Milli Liderimiz ýurdumyzda ýaş nesilleriň zyýanly endiklerden daşda durmaklary, olaryň sagdyn durmuş ýörelgesine eýermekleri üçin uly tagallalary edýär. Ýaşlaryň bedenterbiýe we sport bilen ýakyndan meşgullanmaklygy üçin Watanymyzyň ähli künjeginde sport desgalary yzygiderli açylyp, ulanylmaga berilýär. Hormatly Prezidentimiz sport bilen meşgullanmakda, wagtyňy peýdaly geçirmekde, sportuň dürli görnüşleri bilen türgenleşmekde ýaş nesillere görelde mekdebi bolup, ýaşlaryň kalbynda sporta, sagdyn durmuş ýörelgelerine bolan höwesi goşalandyrýar.
Duşuşygyň ahyrynda oňa gatnaşyjylar ýaşlaryň yhlasly okamaklygy, bedenterbiýe we sport bilen meşgullanmaklygy ugrunda taýsyz tagallalar edýän Gahryman Arkadagymyza alkyş sözlerini aýtdylar.
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.