«PARAHATÇYLYK WE YNANYŞMAK» ATLY HALKARA ÝAŞLAR FORUMY
2021-nji ýylyň 29-njy martynda Türkmenistanyň Sport we ýaşlar syýasaty ministrliginiň guramagynda hormatly Prezidentimiziň Karary bilen tassyklanan Türkmenistanyň Garaşsyzlygynyň 30 ýyllygy, baky Bitaraplygymyzyň 25 ýyllygy, şeýle hem 2021-nji ýylyň «Türkmenistan – parahatçylygyň we ynanyşmagyň Watany» diýip yglan edilmegi mynasybetli Türkmenistanda we daşary ýurtlarda geçirilmegi meýilleşdirilýän çäreleriň Maksatnamasyny durmuşa geçirmek maksady bilen, Türkmenistanyň Daşary işler ministrliginiň Halkara gatnaşyklary institutynda «Parahatçylyk we ynanyşmak» atly halkara ýaşlar forumy geçirildi. Foruma Türkmenistanyň Sport we ýaşlar syýasaty ministrliginiň, Türkmenistanyň Mejlisiniň, Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň wekilleri, paýtagtymyzyň ýokary okuw mekdeplerinden wekiller, şeýle hem sanly wideoaragatnaşyk ulgamy arkaly BMG-niň Çagalar gaznasynyň, Ilat gaznasynyň, ÝUNESKO-nyň, birnäçe daşary ýurtlaryň ýaşlar guramalarynyň wekilleri gatnaşdylar.
Forumyň dowamynda oňa gatnaşyjylar ýaşlary milli, sebit we dünýä derejesinde parahatçylyk medeniýetini ösdürmäge we berkitmäge çekmek meýilnamalaryny hödürlediler, şeýle hem 1999-njy ýylyň 13-nji sentýabrynda BMG-niň Baş Assambleýasy tarapyndan kabul edilen dünýä medeniýeti boýunça Jarnamany we Maksatnamany durmuşa geçirmek üçin ýerine ýetirilýän işler barada tanyşdyrdylar. Bu forumyň netijeleri 2021-nji ýylyň 7-8-nji aprelinde Nýu-Ýork şäherinde geçiriljek BMG-niň Ykdysady we Durmuş Geňeşiniň Ýaşlar forumynyň işine goldaw bolar.
Şular bilen bir hatarda, 2021-nji ýylyň mart aýynda «Parahatçylyk we ynanyşmak» atly halkara ýaşlar forumlarynyň Birleşen Milletler Guramasynyň ulgamyna degişli edaralarynyň, esasanam, BMG-niň Çagalar gaznasynyň, Ilat gaznasynyň gatnaşmagynda bilelikdäki görnüşde geçirilýändigi bellenildi.
Aýgül MÄTIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby