ÖŇÜNI ALYŞ DIPLOMATIÝASY BOÝUNÇA OKUW SAPAGY GEÇIRILDI
2025-nji ýylyň 1-nji oktýabrynda Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkezinde «Howanyň üýtgemegine garşy göreşmekde diplomatiýanyň orny ― Beýik Britaniýanyň garaýşy» atly tema boýunça okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň we beýleki birnäçe ýokary okuw mekdepleriniň talyplary gatnaşdylar.
Okuw sapagyny Beýik Britaniýanyň Türkmenistandaky diplomatik wekilhanasynyň ýolbaşçysynyň orunbasary Kler Olbles alyp bardy. Bu çäräniň dowamynda diplomat halkara derejesindäki howa meseleleri, BMG-niň Howanyň üýtgemegi baradaky Çarçuwaly konwensiýasy we onuň çäklerindäki gepleşikler, şeýle hem Beýik Britaniýanyň hökümetiniň bu ugurdaky ileri tutýan wezipeleri barada giňişleýin gürrüň berdi.
Bu meselelerde ýaşlaryň howa bilen bagly kynçylyklary çözmekdäki işjeň orny, diplomatiýanyň halkara hyzmatdaşlygyny ösdürmekdäki tagallasyna aýratyn üns çekildi.
Çykyşlar tamamlanandan soňra okuw sapagyna gatnaşyjylar üçin interaktiw duşuşyk guraldy we sorag-jogap alşyldy. Bu bolsa türkmen diplomatiýasynyň milli mekdebinde, şeýle hem beýleki ýokary okuw mekdeplerinde bilim alýan talyplaryň özlerini gyzyklandyrýan sowallaryna jogap tapmagynda, özara pikir alyşmagynda aýratyn ähmiýetli boldy.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.