Öňüni alyş diplomatiýasy boýunça fakultatiw okuwlar başlady
2024-nji ýylyň 23-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda öňüni alyş diplomatiýasy ugry boýunça ilkinji okuw sapagy başlandy.
Okuw sapagyny institutyň Halkara gatnaşyklary we diplomatiýa kafedrasynyň mugallymy Rahym Akmuradow alyp bardy. Bu okuw sapagy «Öňüni alyş diplomatiýanyň kesgitlenilişi we zerurlygy» atly tema boýunça geçirildi.
Okuw sapagynyň dowamynda häzirki döwürde öňüni alyş diplomatiýasynyň ähmiýeti hem-de möhümligi, şeýle-de parahatçylygy goldamakda we dünýä gurluşy babatda Birleşen Milletler Guramasynyň ýörite syýasy edaralarynyň ornunyň wajyplygy barada gürrüň berildi.
Söhbetdeşligiň dowamynda talyp ýaşlar mugallyma özlerini gyzyklandyrýan sowallar bilen ýüzlendiler.
Derkar ALLAKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.