ONLAÝN OKUW-USULY MASLAHAT GEÇIRILDI
2026-njy ýylyň 26-njy martynda Türkmenistanyň Daşary işler ministrliginiň Halkara gatnaşyklary institutynda “Halkara ylmy-metrik maglumat bazalarynda ylmy neşirleri dogry saýlamak: Kwartiller (Q1-Q4), impakt-faktorlar we saýlaw kriteriýalary” atly tema boýunça onlaýn okuw-usuly maslahaty geçirildi. Sanly ulgam arkaly geçirilen okuw-usuly maslahata ýurdumyzyň ýokary okuw mekdepleri bilen bir hatarda, Türkmenistanyň Daşary işler ministrliginiň Halkara gatnaşyklary institutynyň professor-mugallymlary hem gatnaşdylar.
Maslahat halkara ylmy-tehniki maglumat çeşmelerinde (platformalarda) indekslenýän žurnallarda makalalaryň çap edilmegini utgaşdyrmak boýunça 2026-njy ýyl üçin taýýarlanan Ýol kartasynda göz öňünde tutulan çäreleri durmuşa geçirmek maksady bilen geçirildi. Onda jikme-jik salgylanmalara hem-de tejribede gazanylan görkezijilere esaslanýan prezentasiýa görkezildi. Bu bolsa maslahatyň täsirliligini artdyryp, mugallymlara şu ugurda baý tejribe toplamaga mümkinçilik döretdi.
Okuw-usuly maslahatyň ahyrynda mugallymlar özlerini gyzyklandyrýan sowallar bilen ýüzlendiler. Sorag-jogap alyşmak arkaly geçirilen onlaýn maslahat örän täsirli boldy. Şeýle okuw maslahatlarynyň geçirilmegi halkara ylmy-tehniki maglumat çeşmelerini öwrenmäge, olarda indekslenýän žurnallarda makalalary çap etdirmäge, dürli bibliometrik görkezijiler bilen bagly düşünjeleri artdyrmaga möhüm ähmiýet berýär.
Maral ORAZGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň mugallym-öwrenijisi.