Onlaýn okuw sapagy
2021-nji ýylyň 12-nji iýunynda Türkmenistanyň Daşary işler ministrliginiň Halkara gatnaşyklary institutynda «Türkmenistan bilen Hytaý Halk Respublikasynyň pandemiýa döwründäki alyp baran daşary syýasaty» atly tema bagyşlanan, onlaýn görnüşde okuw sapagy geçirildi. Türkmenistanyň daşary ýurtlardaky diplomatik wekilhanalarynyň ýolbaşçylarynyň geçirýän toplumlaýyn onlaýn sapaklarynyň çäginde guralan bu okuw sapagyna Türkmenistanyň Hytaý Halk Respublikasyndaky Adatdan daşary we Doly ygtyýarly ilçisi Parahat Durdyýew we institutyň talyplary gatnaşdylar. Bu okuw sapagy ýokary okuw mekdebiň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi. Okuw sapagynda çykyş eden hormatly ilçi Türkmenistanyň Hytaý Halk Respublikasy bilen saglygy goraýyş we Covid-19-a garşy göreş ýaly ugurlardaky alnyp barylýan işler babatda aýtdy. Ol Covid-19 ýokanç keseline garşy Hytaýyň «Sinovac» kompaniýasy tarapyndan işlenilip taýýarlanylan «CoronaVac» waksinasynyň uly tapgyrynyň Türkmenistana getirilendigi we dünýäniň ençeme ýurtlarynda geçirilen kliniki barlaglaryň netijesinde bu waksinanyň ýokary we howpsuz netijeliligi babatda nygtady. Mundan başga-da hormatly ilçi lukmançylyk ulgamynda, hususan-da, dünýäni gurşap alan koronowirus ýokanjyna garşy göreşmek ugurda ikitaraplaýyn hyzmatdaşlygyň möhüm ugurlary barada gyzykly gürrüňleri berdi. Sözüniň ahyrynda ilçi Türkmenistan we Hytaý Halk Respublikasy bilen energiýa pudagynda we beýleki ugurlarda özara diplomatik hyzmatdaşlygyny has-da pugtalandyrmagy maksat edinýändiklerini belläp geçdi.
Okuw sapagynyň ahyrynda talyplar ilçä Türkmenistan bilen Hytaý Halk Respublikasynyň arasyndaky dostlukly we özara bähbitli hyzmatdaşlygy has-da ösdürmäge gönükdirilen sowallary berdiler we bu ugurda özara pikir alyşdylar.
Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.