ONLAÝN ARKALY GEÇIRILEN HALKARA FORUMY
2021-nji ýylyň 5-nji oktýabrynda BMG-niň Aziýa - Ýuwaş ummany sebiti üçin Ykdysady we Durmuş komissiýasynyň guramagynda Durnukly ösüş maksatlaryny iş ýüzünde amala aşyrmak boýunça V Demirgazyk we Merkezi Aziýa forumy onlaýn arkaly öz işine başlady. Şu ýylyň 7-nji oktýabryna çenli dowam etjek bu foruma BMG-niň Aziýa - Ýuwaş ummany sebiti üçin Ykdysady we Durmuş komissiýasynyň (ÝUNESKAP), Türkmenistanyň Maliýe we ykdysadyýet ministriliginiň, Gyrgyzystan Respublikasynyň Daşary işler ministriliginiň ýokary derejeli wekilleri, talyp ýaşlar we köpçülikleýin habar beriş serişdeleriniň wekilleri gatnaşýarlar. Bu foruma gatnaşýanlaryň arasynda Türkmenistanyň Daşary işler ministrliginiň Halkara gatnaşyklary institutynyň talyby Arslankerim Kerimow hem bar.
Forumyň birinji gününde BMG-niň Aziýa - Ýuwaş ummany sebiti üçin Ykdysady we Durmuş komissiýasynyň (ÝUNESKAP) Ýerine ýetiriji sekretary Armida Salsia Alisjahbana, Türkmenistanyň Maliýe we ykdysadyýet ministri Muhammetgeldi Serdarow, Şanhaý Hyzmatdaşlyk Guramasynyň öňki Baş sekretary we Gyrgyzystan Respublikasynyň daşary işler ministri Muratbek Imanaliýew we beýleki ýokary derejeli wekiller çykyş edip, Durnukly ösüş maksatlarynyň iş ýüzünde amala aşyrylmagynyň häzirki ýagdaýynyň we bar bolan mümkinçilikleriň üstünde durup geçdiler.
Forum öz işini ertir we birigün dowam etdirer.
Arslankerim KERIMOW,
Türkmenistanyň Daşary işler ministrliginiň
Halkara gatnaşyklary institutynyň talyby.