Okuw sapaklarynyň nobatdaky tapgyry başlandy
2022-nji ýylyň 23-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda ulag diplomatiýasy boýunça okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň mugallymlary we talyp ýaşlary gatnaşdylar. Bu okuw sapagynda Garaşsyz Döwletleriň Arkalaşygyna agza ýurtlaryň demir ýol ulaglary boýunça Geňeşiniň Ylmy-gözleg we tejribe-konstruktorçylyk edarasynyň (NIOKR) sebitde alyp barýan işi şeýle-de Türkmenistanyň Birleşen Milletler Guramasynyň Halkara söwda hukugy boýunça komissiýasynyň agzalygyna saýlanmagynyň ähmiýeti barada giňişleýin beýan edildi. Talyplar üçin örän täsirli bolan okuw sapagynda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň mugallymy, tehniki ylymlarynyň kandidaty, dosent Öwezmyrat Bäşimow, uly mugallym Perhat Çaryýew ýokarda agzalan temalar boýunça çykyş etdiler. Sapagyň dowamynda talyp ýaşlar bu temalara degişli özlerini gyzyklandyrýan sowallaryny berdiler.
Aýjeren GUTLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň 1-nji ýyl talyby.