Okuw sapaklarynyň nobatdaky tapgyry başlady
Türkmenistanyň Döwlet medeniýet merkeziniň garamagyndaky Döwlet muzeýinde, şeýle hem Döwlet kitaphanasynda Türkmenistanyň Daşary işler ministrliginiň Halkara gatnaşyklary institutynda hereket edýän Durnukly ösüş maksatlary boýunça ylmy-usulyýet merkezi tarapyndan 2020-2021-nji okuw ýyly üçin ylalaşylan okuw maksatnamasyna laýyklykda gurnalýan okuw sapaklarynyň nobatdaky tapgyry başlandy. Tapgyryň dowamynda Aşgabat şäher häkimliginiň, Türkmenistanyň Senagat we gurluşyk önümçiligi ministrliginiň, Türkmenistanyň Maliýe we ykdysadyýet ministrliginiň, Türkmenistanyň Hazar deňzi institutynyň wekilleriniň degişlilikde Durnukly ösüş maksatlarynyň 6-njy, 9-njy, 11-nji, 12-nji maksatlary boýunça çykyşlary meýilleşdirildi.
2021-nji ýylyň maý aýynyň 31-ine Türkmenistanyň Döwlet medeniýet merkeziniň garamagyndaky Döwlet muzeýinde Aşgabat şäher häkimliginiň we Durnukly ösüş maksatlary boýunça ylmy-usulyýet merkeziniň wekilleriniň gatnaşmagynda Durnukly ösüş maksatlarynyň 11-nji maksady bolan Durnukly şäherler we ilatly ýerler boýunça okuw sapagy geçirildi. Okuw sapagyň dowamynda bu ugur boýunça ýurdumyzda hormatly Prezidentimiziň parasatly ýolbaşçylygynda ýerine ýetirilýän ägirt uly işler barada anyk mysallar arkaly giňişleýin gürrüň edildi. Hususan-da, täze binalardyr desgalary özünde jemleýän we sanly tehnologiýalar we intellektual ulgamlar esasynda gurulýan “akylly” täze döwrebap şäherler bolan “Aşgabat-Siti” we Ahal welaýatynyň täze döwrebap edara merkeziniň ýurdumyzyň ilatynyň ýaşaýyş-durmuş derejesiniň has-da ýokarlanmagy ugrunda aýratyn ähmiýetlidigi nygtaldy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.