NUSAÝ ÝADYGÄRLIKLER TOPLUMYNA GEZELENÇ
2024-nji ýylyň 25-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-de Daşary işler ministrliginiň Halkara gatnaşyklary institutynyň bilelikde guramagynda geçirilýän «Halkara gatnaşyklary: parahatçylyk dialogynyň medeniýeti» atly halkara bäsleşiginiň maksatnamasynyň çäklerinde daşary ýurtly myhmanlar ÝUNESKO-nyň Bütindünýä medeni mirasynyň sanawyna girizilen “Nusaý” döwlet taryhy-medeni goraghanasyna baryp gördüler.
Bu gezelenje halkara bäsleşiginiň gatnaşyjylary bolan Azerbaýjan Respublikasynyň, Eýran Yslam Respublikasynyň, Hytaý Halk Respublikasynyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Özbegistan Respublikasynyň, Türkiýe Respublikasynyň, Russiýa Federasiýasynyň ýokary okuw jaýlarynyň talyplary we olara ýolbaşçylyk edýän professor-mugallymlary gatnaşdylar. Gezelenjiň barşynda olar Köne we Täze Nusaý galalary gadymy medeniýetleriň yzlaryny özünde saklaýan ýädygärlikler toplumy bilen tanyşdylar. Myhmanlar gadymy Parfiýa patyşalygynyň ýadygärlikleriniň öwrenilişi, arheologlaryň goraghanadan tapan taryhy tapyndylary bilen tanşyp, olaryň ägirt uly ähmiýete eýedigini tassyklaýan we geljekki gözlegleri talap edýän soňky ylmy barlaglar baradaky maglumatlary aldylar.
Türkiýe Respublikasyndan gelen myhmanlar “Nusaý” döwlet taryhy-medeni goraghanasynyň ýadygärlikler toplumyna aýlanyp: “Öz taryhym göz öňüme geldi” - diýip ýürek buýsançlaryny beýan etdiler. Şeýle-de myhmanlar, şol taryhy döwrüň diplomatik gatnaşyklary barada özara söhbetdeşlik edip, pikir alyşdylar.
Gezelenje gatnaşyjylar ýurdumyzda ýaş nesilleriň ukyp-başarnyklaryny, zehin aýratynlyklaryny ýüze çykarmaga döredilýän giň mümkinçilikler üçin hormatly Prezidentimize minnetdarlyk sözlerini aýtdylar.
Suraý AKMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti
öwreniş ylymlary kafedrasynyň mugallymy.