NOBATDAKY ONLAÝN AÇYK SAPAGY
2025-nji ýylyň 29-njy oktýabrynda Myrat Garryýew adyndaky Türkmenistanyň Döwlet lukmançylyk uniwersitetiniň guramagynda “Alkogol we onuň adam bedenine ýetirýän zyýanly täsiri” atly tema boýunça ýokary okuw mekdepleriniň mugallymlarynyň we talyp ýaşlarynyň gatnaşmagynda onlaýn görnüşinde açyk sapak geçirildi. Bu açyk sapaga Türkmenistanyň Daşary işler ministrliginiň Halkara gatnaşyklary institutynyň mugallymlary hem-de talyp ýaşlary işjeň gatnaşdy.
Sapagyň dowamynda çykyş edenler Berkarar döwletiň täze eýýamynyň Galkynyşy döwründe ýaş nesilleriň döwrebap ylym-bilim almaklary, kämil hünärmenler bolup ýetişmekleri üçin ähli zerur şertleriň döredilýändigi, 2021-nji ýylyň 26-njy martynda Türkmenistanyň Prezidentiniň gol çeken Karary bilen «Saglyk» Döwlet maksatnamasynyň rejelenen görnüşiniň hem-de ony amala aşyrmak boýunça ýerine ýetirilmeli çäreleriň 2021-2025-nji ýyllar üçin Meýilnamasynyň durmuşa geçirilişi barada bellediler.
Onlaýn arkaly geçen açyk sapak Myrat Garryýew adyndaky Türkmenistanyň Döwlet lukmançylyk uniwersitetiniň Psihiatriýa, narkologiýa we medisina psihologiýasy kafedrasynyň assistenti B.Meredowa tarapyndan geçirildi. Alkogolyň zyýanly täsiri, alkogolyň ulanylmagy netijesinde adamyň janyna ýa-da saglygyna, onuň nesline, ýaşaýan gurşawyna, töweregindäki adamlara ýetirýän täsiri dogrusynda gürrüň berdiler.
Açyk sapagyň dowamynda saglygy goraýyş ulgamynda ýetilen sepgitler, sagdyn durmuş ýörelgesi baradaky düşünjäni köpçüligiň aňynda berk ornaşdyrmak maksady bilen geçirilýän wagyz-nesihat işleriň ilatyň ömrüniň dowamlylygyny uzaltmaga, keselçiligiň derejesini peseltmäge, keselleriň ýaýramagynyň öňüni almaga, döwletiň berk binýady bolan sagdyn jemgyýeti kemala getirmäge ýardam berýändigi barada nygtaldy.
Saparmyrat MATKURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.