NEPISLIGIŇ NUSGASY TÜRKMEN HALYSY
2024-nji ýylyň 29-njy oktýabrynda Türkmenistanyň Daşary işler ministrliginiň Halkara gatnaşyklary institutynyň ilkinji Zenanlar guramasy "Ýaşlyk" teleýaýlymy bilen bilelikde Türkmen halysynyň milli muzeýine talyp gyzlaryň gezelenjini gurady. Gezelenjiň dowamynda talyp gyzlar türkmen zenanlarynyň yhlasyndan syzylyp çykan deňsiz-taýsyz, gadymy türkmen halylarynyň dokalyş taryhy, milli nagyşlaryň döreýşi, haly gölleriniň tapawutly aýratynlyklary barada täsin maglumatlar bilen tanyşdylar. Bu muzeýde özüniň nepisligi, dokalyş aýratynlygy, döreýiş taryhy boýunça tapawutlanýan müňlerçe haly eksponatlary bolup, olaryň arasynda Magtymguly Pyragynyň doglan gününiň 300 ýyllygyna bagyşlanyp dokalan ajaýyp haly hem bar.
Türkmen zenanlarynyň müňýyllyklaryň dowamynda döreden milli gymmatlyklaryny gorap saklamakda, öz milliligimize bolan söýgini ösdürmekde we geljekki nesillerimize ýetirmekde şeýle gezelençleriň ähmiýeti örän uludyr.
Güljan SERDAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň
1-nji ýyl talyby.