MILLILIGIMIZIŇ HALKARA YKRARNAMASY
2022-nji ýylyň 10-njy fewralynda Türkmen döwlet bedenterbiýe we sport institutynda «Dutar ýasamak senetçiligi, dutarda saz çalmak we bagşyçylyk sungatynyň» ÝUNESKO-nyň Adamzadyň maddy däl medeni mirasynyň sanawyna girizilmegi mynasybetli dabaraly maslahat geçirildi.
Maslahat Türkmenistanyň Magtymguly adyndaky Ýaşlar guramasynyň Merkezi geňeşiniň, ÝUNESKO-nyň işleri barada Türkmenistanyň Milli toparynyň,Türkmenistanyň Medeniýet ministrliginiň we Türkmenistanyň Bilim ministrliginiň bilelikde gurnamagynda geçirildi. Oňa ady agzalan edaralaryň we guramalaryň wekilleri şeýle hem institutyň mugallymlary we talyp ýaşlary gatnaşdylar.
Maslahatyň dowamynda Türkmenistanyň Magtymguly adyndaky Ýaşlar guramasynyň Merkezi Geňeşiniň esasy hünärmeni Merjen Nurmuhammedowa, ÝUNESKO-nyň işleri barada Türkmenistanyň Milli toparynyň Sekretariatynyň meýletinçisi, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň IV ýyl talyby Aýbölek Kakabaýewa we Türkmen döwlet bedenterbiýe we sport institutynyň professor-mugallymlary Hormatly Prezidentimiziň ýurdumyzyň milli gymmatlyklaryny gorap saklamak, olary dikeltmek we geljek nesillere bütewilikde ýetirmek babatynda alyp barýan giň gerimli işleri barada giňişleýin çykyş etdiler. Şeýle hem Hormatly Prezidentimiziň göreldesine eýerip, ata-babalarymyzdan miras galan türkmen halkynyň ruhy gymmatlyklaryny baýlaşdyrmak we dünýä ýaýmak babatynda türkmen ýaşlarynyň öňünde duran mukaddes wezipeler barada aýratyn nygtaldy.
Dabaraly maslahatyň dowamynda “Sagdyn nesiller” döredijilik toparynyň sazandalarynyň dutarda ýerine ýetiren türkmen halk aýdymlary gatnaşyjylarda ýatdan çykmajak täsir galdyrdy.
Çäräniň dowamynda oňa gatnaşanlar türkmen halkynyň milli mirasynyň dünýä giňişligindäki abraýyny belende göterýän Gahryman Arkadagymyza alkyş sözlerini aýtdylar.
Aýbölek Kakabaýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.