MILLI MAGLUMAT-AMALY SEMINARY GEÇIRILDI
2024-nji ýylyň 23-nji dekabrynda “Arçabil” myhmanhanasynda Halkara Gyzyl Haç Guramasynyň guramagynda 1949-njy ýyldaky Ženewa Konwensiýalarynyň kabul edilmeginiň 75 ýyllygyna bagyşlanan “Halkara ynsanperwer hukugynyň ösmeginiň we siňdirmegiň wajyň meseleleri” atly Milli maglumat-amaly seminary geçirildi. Bu seminara Türkmenistanyň Mejlisiniň, Daşary işler ministrliginiň, ýurdumyzyň ýokary okuw mekdepleriniň, ylmy edaralarynyň, hukuk goraýjy edaralarynyň, Türkmenistanyň Gyzyl Ýarymaý Milli jemgyýetiniň, şeýle-de jemgyýetçilik guramalarynyň wekilleri gatnaşdylar.
Seminarda esasan hem, Türkmenistan döwletiniň öz üstüne alan borçlaryna laýyklykda, halkara ynsanperwer hukugynyň binýatlaýyn kadalaryny giňden wagyz etmek, ýaýratmak we uýgunlaşdyrmak boýunça çäreleriň toplumlaýyn maksatnamasy işlenip taýýarlanylmagy hem-de üstünlikli durmuşa geçirilmegi, halkara ynsanperwer hukugynyň kadalarynyň milli kanunçylyga ornaşdyrylmagy dogrusynda gürrüň edildi. Şeýle-de, maksatnamalaýyn çäreleriň hatarynda Türkmenistanda adam hukuklary we halkara ynsanperwer hukugy boýunça degişli Pudagara toparynyň mejlisleriniň netijesinde “Türkmenistanda adam hukuklary boýunça 2021 --- 2025-nji ýyllar üçin Hereketleriň milli Meýilnamasyny”, "Türkmenistanda gender deňligi boýunça 2021 --- 2025-nji ýyllar üçin Hereketleriň milli Meýilnamasyny”, “Türkmenistanda çagalaryň hukuklaryny durmuşa geçirmek boýunça 2023 --- 2028-nji ýyllar üçin hereketleriň milli Meýilnamasyny” durmuşa geçirmegiň meseleleri ara alnyp maslahatlaşyldy.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
hukugy we deňeşdirme hukuk öwreniş
kafedrasynyň uly mugallymy.