Milli demokratiýanyň dabaralanmagyna bagyşlanan maslahat
2022-nji ýylyň 12-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Milli Geňeşiniň Halk Maslahatynyň mejlisine bagyşlanyp, professor-mugallymlaryň we talyp ýaşlaryň gatnaşmagynda maslahat geçirildi. Maslahatda Türkmenistanyň Milli Geňeşiniň Halk Maslahatynyň mejlisine gatnaşan professor-mugallymlar we talyp ýaşlar çykyş etdiler.
Çykyş edenler Türkmenistanyň Milli Geňeşiniň Halk Maslahatynyň mejlisinde hormatly Prezidentimiziň öňe süren teklipleri, «Türkmenistan — parahatçylygyň we ynanyşmagyň Watany» ýylynda gazanylan netijeler barada belläp geçdiler. Esasan hem geljekki ýyllar üçin möhüm wezipeleri kesgitlemek baradaky öňde goýlan işler ara alnyp maslahatlaşyldy. Şeýle hem çykyş edenler Halk Maslahatynyň mejlisinde 30 ýyllyk döwür üçin taryhy çözgüdiň, ýagny «Berkarar döwletiň täze eýýamynyň Galkynyşy: Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasynyň» tassyklanylandygyny belläp, bu maksatnamanyň geljekde türkmen halkynyň abadan durmuşda ýaşamagy üçin gönükdirilendigini nygtadylar.
Eziz Watanymyzyň geljek döwrüniň «Berkarar döwletiň täze eýýamynyň Galkynyşy» diýlip atlandyrylmagy we bu döwürde ýurdumyzyň geljegi bolan ýaşlara berilýän ornuň has-da ýokarlandyrylmagy baradaky pikirler maslahatyň esasy özenini düzdi.
Maslahatyň ahyrynda çykyş edenleriň her biri milli demokratiýanyň dabaralanmagy ugrunda uly aladalary edýän hormatly Prezidentimiziň türkmen halkynyň abadan geljegi üçin alyp barýan işleriniň barha rowaçlyklara beslenmegini, janynyň sag, ömrüniň uzak bolmagyny arzuw etdiler.
Tawus AKJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.