MERKEZI AZIÝANYŇ DIPLOMATLARY ÜÇIN 3-NJI ÝÖRITE OKUW SAPAKLARY TAMAMLANDY
2024-nji ýylyň 14-25-nji oktýabry aralygynda Hindistan Respublikasynyň Daşary işler ministrliginiň Suşma Swaraj adyndaky diplomatik gullugy institutynda Merkezi Aziýa döwletleriniň diplomatlary üçin niýetlenilen 3-nji ýörite okuw sapaklary geçirildi.
Bu okuw sapaklaryna döwletimiziň adyndan Türkmenistanyň Daşary işler ministrliginiň Halkara gatnaşyklary institutynyň mugallymlary Meýlis Nepesow bilen Meýlis Gylyşaýew dagylar wekilçilik etdiler. Ýeri gelende belläp geçsek, 2015-nji ýylda Türkmenistanyň Daşary işler ministrliginiň Halkara gatnaşyklary instituty bilen Hindistan Respublikasynyň Daşary işler ministrliginiň Suşma Swaraj adyndaky diplomatik gullugy institutynyň arasynda özara düşünişmek barada Ähtnama hem gol çekilipdi.
Hindistanda Merkezi Aziýa döwletleriniň diplomatlary üçin geçirilýän okuw sapaklarynda professor-mugallymlar, syýasatçylar, diplomatlar ýörite kesgitlenen temalar boýunça okuw sapaklarynda çykyş etdiler. Hindistan Respublikasynyň Daşary işler ministrliginiň Suşma Swaraj adyndaky diplomatik gullugy institutynda Hindistan Respublikasynyň daşary syýasatynda alyp barýan işleri, şeýle-de bu döwletiň Merkezi Aziýa ýurtlary bilen ýola goýan ýokary derejeli gatnaşyklaryna degişli temalar, döwletiň içerki sanly bilim infrastrukturasy, döwletiň energetika syýasaty we daşky gurşawy goramak ýaly meseleler boýunça okuw sapaklary geçirildi. Sapaklaryň dowamynda olara gatnaşyjylar gyzyklanýan soraglary boýunça kanagatlanarly jogaplary aldylar. Mundan başga-da, bu okuw sapaklaryna gatnaşýanlar üçin dürli medeni çäreler hem niýetlenilip ýagny Hindistan Respublikasynyň Premýer-ministriniň muzeýine we kitaphanasyna, Maruti-Suzuki awtomobil öndüriji kärhanasyna, Hindistan Respublikasynyň söwda we senagat edarasyna, şeýle-de Jaýpur şäheriniň medeni taryhy ýerlerine gezelenç guraldy. Okuw sapagynyň soňky gününde Merkezi Aziýa döwletleriniň wekilleri öz döwletlerini tanyşdyrýan prezentasiýalar bilen çykyş etdiler. Bu çäräniň ahyrynda Suşma Swaraj adyndaky diplomatik gullugy institutynyň dekany Raj Kumar Sriwastawa tarapyndan gatnaşyjylara sertifikatlar gowşurylyp, ýadygärlik suratlara düşüldi. Şeýle okuw sapaklarynyň geçirilmegi ýaş hünärmenleriň hünär derejelerini ýokarlandyrmakda şeýle hem halkara gatnaşyklarynda döwletleri jebisleşdirmekde örän ähmiýetlidir.
Türkmenistan bilen Hindistan Respublikasynyň arasyndaky gatnaşyklar öz gözbaşyny taryhyň gadymyýetinden alyp gaýdyp bu gatnaşyklar häzirki wagtda täze many-mazmun bilen dowam etdirilýär.
Meýlis GYLYŞAÝEW,
Türkmenistanyň Daşary işler ministrliginiň
Halkara gatnaşyklary institutynyň mugallym-öwrenijisi.