MEKDEP OKUWÇYLARYNYŇ ARASYNDA DERS OLIMPIADASYNYŇ II TAPGYRY GEÇIRILDI
2026-njy ýylyň 27-nji aprelinde Türkmenistanyň Daşary işler ministrliginiň Halkara gatnaşyklary institutynda «Watanyň daýanjy — bilimli ýaşlar, Arkadagly Gahryman Serdaryň guwanjy ýaşlar!» atly Türkmenistanyň taryhy, matematika, türkmen dili, iňlis dili dersleri boýunça olimpiadanyň II tapgyry geçirildi.
Mälim bolşy ýaly, bu olimpiada Birleşen Milletler Guramasy tarapyndan yglan edilen Halkara bilim güni mynasybetli ýurdumyzyň orta mekdepleriniň 12-nji synp okuwçylarynyň arasynda guralýar. Ders olimpiadasynyň II tapgyryna I tapgyrdan üstünlikli geçmegi başaran ýurdumyzyň ähli welaýatlaryndan, Aşgabat we Arkadag şäherlerinden mekdep okuwçylarynyň 200-e golaýy gatnaşdy.
Hormatly Prezidentimiziň: «Biz bilim ulgamynda ruhy taýdan kämil, giň dünýägaraýyşly ýaş nesilleri terbiýelemek boýunça netijeli işleri alyp barýarys» diýip belleýşi ýaly, häzirki wagtda ýurdumyzda ýaş nesilleriň kämil bilim almaklary üçin maksatnamalaýyn işler durmuşa geçirilýär. Munuň şeýledigini «Ýaşlar barada döwlet syýasaty hakynda» Türkmenistanyň Kanunynyň rejelenen görnüşiniň kabul edilmegi, «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy», «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasy» hem doly aýdyňlygy bilen subut edýär. Döwletimiz tarapyndan edilýän şeýle bimöçber aladalaryň netijesinde türkmen ýaşlary ýurdumyzda we daşary döwletlerde geçirilýän halkara ders bäsleşikleridir olimpiadalarda üstünlikli çykyş edýärler.
Türkmen diplomatiýasynyň milli mekdebi tarapyndan Türkmenistanyň taryhy, matematika, türkmen dili, iňlis dili dersleri boýunça guralan olimpiada hem ýurdumyzyň mekdep okuwçylarynyň intellektual derejesini kesgitlemäge, okgunly ösýän bazar ykdysadyýeti şertlerinde innowasion tehnologiýalary ulanmakdan baş çykarýan we çylşyrymly meseleleri özbaşdak çözmegi başarýan zehinli ýaşlary ýüze çykarmakda möhüm ähmiýete eýedir.
Olimpiadanyň II tapgyrynyň netijeleri ýakyn wagtda institutyň resmi internet sahypasynda ýerleşdiriler.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.