MEDIA TOPARYNYŇ NOBATDAKY OKUW SAPAGY
2026-njy ýylyň 21-nji ýanwarynda Türkmenistanyň Daşary işler ministrliginiň Halkara gatnaşyklary institutynda şu ýylyň 11-nji fewralynda Aşgabat şäherinde geçirilýän Türkmenistanyň «Arkadag» futbol kluby bilen Saud Arabystanynyň «Al-Nasr» toparynyň arasynda AFC-2 Çempionlar ligasynyň 1/8 finalynyň ilkinji duşuşygyny şöhlelendirmek maksady bilen ýurdumyzyň ýokary okuw mekdeplerinden gatnaşjak ýörite habarçylar (media) toparynyň ýaş wagyzçylary bilen sanly ulgam arkaly nobatdaky okuw sapagy geçirildi. Oňa «Garaşsyz, baky Bitarap Türkmenistan – bedew batly at-myradyň mekany» ýylynda geçiriljek köpçülikleýin sport we medeni çäreleri köpçülikleýin habar beriş serişdelerinde şöhlelendirmek maksady bilen, degişli ýokary okuw mekdepleriniň žurnalistika hünärinde bilim alýan talyplaryndan we tejribeli mugallymlardan ybarat bolan habarçylar (media) toparynyň agzalary sanly ulgam arkaly gatnaşdylar.
Okuw sapagyny «Sport – parahatçylygyň ilçisi» atly tema boýunça Halkara Ynsanperwer ylymlary we ösüş uniwersitetiniň Žurnalistika kafedrasynyň uly mugallymy Gözel Pirmuhammedowa alyp bardy. Mugallym öz çykyşynda parahatçylygyň ilçisi hasaplanylýan sport diplomatiýasynyň ähmiýeti, soňky ýyllarda ýurdumyzda geçirlen halkara sport ýaryşlary barada nygtap, sportuň döwletleriň we halklaryň arasynda parahatçylygy we agzybirligi berkitmäkdäki aýratynlygy barada täsirli gürrüň berdi.
Sanly ulgam arkaly geçirilen okuw sapagynynyň ahyrynda oňa gatnaşyjylar ýaşlara döredilýän ähli mümkinçilikler üçin Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Bikejemal ANNANUROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.