Media sowatlylygy boýunça tejribelik okuw sapagy geçirildi
2025-nji ýylyň 16-17-nji sentýabrynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkeziniň binasynda media sowatlylygy boýunça tejribelik okuw sapagy geçirildi. Onda Türkmenistanyň Ýokary kazyýetiniň Kazyýetiň işini guramak müdirliginiň wekili, «Türkmenportal» saýtynyň žurnalisti çykyş etdiler. Halkara bilermen hökmünde bolsa, Gazagystan Respublikasynyň MediaNet Halkara žurnalistika merkeziniň wekili Duman Smakow onlaýn görnüşde gatnaşdy. Maslahata degişli edaralaryň, köpçülikleýin habar beriş serişdeleriniň wekilleri, ýokary okuw mekdepleriniň žurnalistika hünäriniň, şol sanda Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar.
Okuw sapagynyň maksatnamasy häzirki zaman media giňişliginiň esasy meselelerini öz içine aldy. Media sowatlylygynyň täze ýörelgeleri, bu ugurda halkara we milli hukuk kadalary, habarlary gözden geçirmegiň usullary, maglumatlaryň anyklygyny barlamak, şeýle hem döwlet edaralarynyň işinde emeli aňy dogry ulanmak barada giňişleýin durlup geçildi. Şeýle-de oňa gatnaşanlar surat we wideo materiallary barlamak ýaly amaly usullary özleşdirdiler hem-de sosial ulgamlarda howpsuzlyk düzgünlerini ara alyp maslahatlaşdylar.
Okuw maslahaty sowal-jogap esasynda täsirli geçdi.
Okuw sapagynyň ahyrynda oňa gatnaşan diňleýjilere sertifikatlar gowşuryldy.
Ogulmaýsa ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.