MEDENIÝETLERIŇ RUHY ARABAGLANYŞYGY: ÝAPON WE HYTAÝ DILLERI GÜNI
2026-njy ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynda dowam edýän «Diller – dostluk çemeni» atly hepdeligiň çäklerinde ýapon we hytaý dilleri güni mynasybetli dabaraly çäre geçirildi. Bu çäre talyplaryň gündogaryň gadymy medeniýetlerine bolan gyzyklanmasyny artdyrmakda we dilleriň üsti bilen halkara dostluk köprülerini has-da berkitmekde täsirli pursatlara beslendi.
Çäräniň dowamynda myhmanlary Ýaponiýanyň özboluşly taryhy we milli gymmatlyklary bilen tanyşdyrmak maksadynda ýörite sergi guralyp, onda ýapon halkynyň tebigata bolan sarpasyny alamatlandyrýan Sakura agajynyň gözelligi hem-de milli tagamlaryň inçelikleri hakyndaky görkezmeler gatnaşyjylarda uly täsir galdyrdy. Şeýle-de, ýapon halkynyň ruhy dünýäsiniň aýrylmaz bölegi bolan nepis çaý ýasamak sungatynyň taryhy we pelsepesi talyplar tarapyndan janly görnüşde tanyşdyryldy.
Dabara gatnaşan talyp ýaşlar Ýaponiýanyň häzirki zaman ylym-bilim ösüşi we ýapon diliniň özboluşly aýratynlyklary barada taýýarlan multimediýa prezentasiýalary bilen çykyş edip, dürli ieroglifleri okamagyň we ýapon taýajyklaryny ulanmagyň tärleri boýunça guralan gyzykly oýunlar arkaly özleriniň intellektual başarnyklaryny hem-de dile bolan ukyplaryny açyp görkezdiler.
Günüň iň täsirli pursatlarynyň biri hökmünde türkmen halkynyň akyldar şahyry Magtymguly Pyragynyň dünýä dillerine terjime edilen «Türkmeniň» atly goşgusynyň ýapon dilinde çeper okalmagy, iki dostlukly halkyň arasyndaky ruhy we medeni arabaglanyşygyň belentdigini ýene bir ýola subut etdi. Şeýle-de, talyplar tarapyndan ýapon dilinde ýokary çeperçilik bilen ýerine ýetirilen «Sakura» aýdymy dabaranyň şowhunyny has-da artdyryp, gatnaşyjylara medeni lezzet berdi.
«Diller – dostluk çemeni» atly hepdeligiň ýapylyş çäresinde bolsa, dil hepdeliginiň dowamynda geçirilen dürli bäsleşiklerde we medeni çärelerde özüniň işjeňligi hem-de daşary ýurt dillerini öwrenmäge bolan aýratyn höwesi bilen tapawutlanan talyp ýaşlara ýörite sowgatlar dabaraly ýagdaýda gowşuryldy.
Dünýägözel BABAHANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri
kafedrasynyň mugallymy.