Medeni diplomatiýanyň beýik ýeňşi
2022-nji ýylyň 10-njy fewralynda Türkmenistanyň Oguzhan adyndaky Inžener-tehnologiýalar uniwersitetinde “Dutar ýasamak senetçiliginiň, dutarda saz çalmak we bagşyçylyk sungatynyň” ÝUNESKO-nyň Adamzadyň maddy däl medeni mirasynyň sanawyna girizilmegi mynasybetli dabaraly maslahat geçirildi.
Maslahat Türkmenistanyň Magtymguly adyndaky Ýaşlar guramasynyň Merkezi geňeşiniň, ÝUNESKO-nyň işleri barada Türkmenistanyň Milli toparynyň, Türkmenistanyň Medeniýet ministrliginiň we Türkmenistanyň Bilim ministrliginiň bilelikde gurnamagynda geçirildi. Oňa degişli edaralaryň wekilleri, Oguzhan adyndaky Inžener-tehnologiýalar uniwersitetiniň mugallymlary we talyplary gatnaşdylar.
Maslahatyň dowamynda Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň sanly ulgam boýunça esasy hünärmeni Merdan Nuryýew, ÝUNESKO-nyň işleri barada Türkmenistanyň Milli toparynyň Sekretariatynyň meýletinçisi hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň IV ýyl talyby Jemal Rematullaýewa, Türkmenistanyň Oguzhan adyndaky Inžener-tehnologiýalar uniwersitetiniň Jemgyýeti öwreniş ylymlary kafedrasynyň mugallymy Perhat Çaryýew we şol uniwersitetiň Innowasiýalaryň ykdysadyýeti fakultetiniň II ýyl talyby Aýjan Tekäýewa çykyş etdiler. Olar Hormatly Prezidentimiziň hoşniýetli medeni diplomatiýasynyň halkara giňişliginde gazanýan beýik ýeňişleri, şeýle-de türkmen dutarynyň halkara ykrarnama eýe bolup, Umumadamzat mirasynyň aýrylmaz bölegine öwrülmegi hem Gahryman Arkadagymyzyň ata-babalarymyzdan miras galan gymmatlyklarymyzy gorap saklamak, olary dikeltmek we bütewiligi bilen ösüp gelýän ýaş nesillere ýetirmek, milli mirasymyzyň halkara abraýyny, mertebesini has hem beýgeltmek ugrunda edýän taýsyz tagallalarynyň aýdyň netijesidigi, türkmen halkynyň gaýtalanmajak, özüne çekiji ruhy gymmatlyklaryny baýlaşdyrmak we dünýä ýaýmak ýaşlaryň öňünde duran gaýragoýulmasyz wezipedigi dogrusynda giňişleýin gürrüň berdiler.
Dabaraly maslahatyň dowamynda uniwersitetiň “Oguzlar” döredijilik toparynyň sazandalarynyň uly höwes hem-de ýokary ussatlyk bilen ýerine ýetiren aýdym-sazlary gatnaşyjylarda ýatdan çykmajak täsir galdyrdy.
Maslahata gatnaşanlar türkmen halkynyň milli mirasynyň dünýä giňişligindäki abraýyny, mertebesini belende göterýän Gahryman Arkadagymyza alkyş sözlerini aýtdylar.
Jemal Rematullaýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.