Maslahat geçirildi
2021-nji ýylyň 25-nji maýynda Türkmenistanyň Daşary işler ministrliginiň Halkara gatnaşyklary institutynda 2021-nji ýylyň 29-njy ýanwarynda Türkmenistan, Täjigistan Respublikasy, Özbegistan Respublikasy bilen bilelikde Beýik Ýüpek ýolunyň Zerewşan-Garagum geçelgesiniň şahalaryny ÝUNESKO-nyň Bütindünýä medeni we tebigy mirasynyň sanawyna bilelikde hödürlemek, dolandyrmak we goramak hakynda Ylalaşyga gol çekilmeginiň ähmiýetine bagyşlanan maslahat geçirildi. Institutyň Halkara ykdysady gatnaşyklary fakulteti tarapyndan guralan bu maslahata “Ýaş ykdysatçylar” ylmy gurnagynyň agzalary, institutynyň mugallymlary gatnaşdylar.
Maslahatda Halkara ykdysady gatnaşyklary kafedrasynyň müdiriniň w.w.ý.ý.,uly mugallym P.Çaryýew, kafedranyň uly mugallymy B.Mesow, kafedranyň öwreniji mugallymy G.Berdiýew we beýlekiler çykyş edip, hormatly Prezidentimiziň «Türkmenistan – Beýik Ýüpek ýolunyň ýüregi» atly kitabynda bu taryhy fenomeniň tutuş adamzat siwilizasiýasynyň ösüşine ähmiýetli täsirini ýetiren özboluşlylyk hökmünde nygtap aýtdylar.
Şeýle-de maslahatyň çäklerinde Aşgabat şäheriniň esaslandyrylmagynyň 140 ýyllygyna bagyşlanan prezentasiýa bäsleşiginiň jemi jemlendi. Bäsleşikde Halkara ykdysady gatnaşyklary fakultetiniň 4-nji ýyl talyby T.Ballyýewa 1-nji orna, şol fakuletetiniň 2-nji ýyl talyby M. Hojamyradow 2-nji orna, şol fakultetiň 3-nji ýyl talyby D.Tejenow 3-nji orna, şol fakultetiň 1-nji ýyl talyby B.Berdiýewa 3-nji orna mynasyp boldular. Türkmenistanyň Magtymguly adyndaky Ýaşlar guramasynyň Merkezi Geňeşiniň adyndan 1-nji, 2-nji, 3-nji orunlara mynasyp bolanlar bolsa ýadygärlik sowgatlary gowşuryldy.
Maslahata gatnaşyjylar ýaşlary ylym bilen meşgullanmaga giňden çekmekde berýän çäksiz goldawlary üçin hormatly Prezidentimize alkyş sözlerini aýtdylar.
Ogulbagt ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň
1-nji ýyl talyby.