“Magtymguly Pyragynyň döredijilik mirasy: medeni we ynsanperwer ugurlary” atly tegelek stol maslahaty geçirildi
2024-nji ýylyň 27-nji martynda Russiýa Federasiýasynyň W.N.Tatişew adyndaky Astrahan döwlet uniwersitetiniň gurnamagynda türkmen halkynyň beýik şahyry we akyldary Magtymguly Pyragynyň doglan gününiň 300 ýyllygy mynasybetli “Magtymguly Pyragynyň döredijilik mirasy: medeni we ynsanperwer ugurlary” atly tegelek stol maslahaty geçirildi.
Mälim bolşy ýaly, 2023-nji ýylyň 11-nji oktýabrynda Türkmenistanyň Daşary işler ministrliginiň Halkara gatnaşyklary instituty bilen Russiýa Federasiýasynyň W.N.Tatişew adyndaky Astrahan döwlet uniwersitetiniň arasynda özara düşünişmek hakynda Ähtnama gol çekildi. Bu maslahata Astrahan oblastynyň daşary aragatnaşyklar ministrliginiň wekilleri, Türkmenistanyň Astrahan şäherindäki konsullygynyň wekilleri, W.N.Tatişew adyndaky Astrahan döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, S.A.Nyýazow adyndaky Türkmen oba hojalyk uniwersitetiniň professor-mugallymlary, talyplary gatnaşdylar.
Tegelek stol maslahatyny açyp bermek bilen, W.N.Tatişew adyndaky Astrahan döwlet uniwersitetiniň prorektory Angelina Gennadýewna Fadin Russiýa Federasiýasy bilen Türkmenistanyň arasyndaky dostlukly gatnaşyklar, türkmen halkynyň akyldar şahyry Magtymguly Pyragynyň şygryýet älemi, ony öwrenmegiň wajyplygy hakynda belledi. Öz çykyşynda Türkmenistanyň Daşary işler ministrliginiň Halkara gatnaşyklary institutynyň rektory, taryh ylymlarynyň kandidaty J.Ş.Gurbangeldiýew Magtymguly Pyragynyň döwründe türkmen-rus gatnaşyklary, XVIII asyrda Türkmenistanyň çäklerinde rus alymlary tarapyndan alnyp barlan ylmy-barlag işler dogrusynda, şeýle Astrahanda ýaşaýan türkmen kowçumlary, olar bilen ýurdumyzyň arasyndaky gatnaşyklar hakynda gyzykly maglumatlary beýan etdi.
Maslahatyň dowamynda türkmen-rus gatnaşyklarynyň taryhy we şu güni, Magtymguly Pyragynyň pähim-paýhasa ýugrulan döredijiligi, akyldaryň şygyrlarynyň umumadamzat gymmatlygy hökmünde ykrar edilmegi, şahyryň şygyrlaryny rus diline terjime etmekde öz mynasyp goşandyny goşan alymlar we edebiýatçylar dogrusynda giňişleýin gürrüň edildi. Şeýle-de tegelek stol maslahatynyň çäginde oňa gatnaşýanlar gyzyklanýan ugurlary boýunça pikir alyşdylar. Maslahata gatnaşyjylar geljekde hem Russiýa Federasiýasynyň W.N.Tatişew adyndaky Astrahan döwlet uniwersiteti bilen Türkmenistanyň ýokary okuw mekdepleriniň arasyndaky hyzmatdaşlygy mundan beýläk hem ösdürmegiň wajyplygyny bellediler.
Aýna BAÝMURADOWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary kafedrasynyň uly mugallymy.