Lukmançylyk ylmyna goşant
2024-nji ýylyň 18-nji oktýabrynda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy-ensiklopedik eseriniň täze XVI jildiniň tanyşdyryş dabarasy boldy. Täze neşir sagdynlygy iň uly gymmatlyk hasaplaýan halkymyz üçin ajaýyp sowgatdyr, geljekki nesiller üçin hem bahasyna ýetip bolmajak hazynadyr.
Tanyşdyryş dabarasynda çykyş edenler «Il saglygy — ýurt baýlygy» diýen ajaýyp pähimden ugur alnyp, saglygy goraýyş ulgamynda ägirt uly işleriň durmuşa geçirilýändigini, şeýle hem lukmançylyk diplomatiýasynyň ösdürilýändigini nygtadylar. Şunda «Saglyk» Döwlet maksatnamasyna laýyklykda jemgyýetimizde durmuşa geçirilýän beýik işler her birimiziň kalbymyzy buýsanja besleýär. Bu neşir ýurdumyzda bitýän dermanlyk ösümlikleri bütin dünýäde wagyz etmäge mümkinçilik berýär. Şeýle hem ol diňe bir ýurdumyzyň lukmançylyk ylmynyň däl-de, eýsem, dünýä farmokologiýasynyň, fitoterapiýanyň, lukmançylyk diplomatiýasynyň hem ösdürilmegine ägirt uly goşantdyr.
Baýramçylyk günlerinde Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda paýtagtymyzda germaniýaly dünýä meşhur kardiolog lukman Hans Maýsneriň ady dakylan şaýoluň we onuň ugrunda «Kalbyň şypasy» atly täze binanyň dabaraly açylmagynyň möhüm taryhy wakalardygy çykyşlarda aýratyn bellenildi.
Nygtalyşy ýaly, Türkmenistanyň Ylymlar akademiýasynyň akademigi, lukmançylyk ylymlarynyň doktory, professor Gahryman Arkadagymyz paýhasly pederlerimiziň köpasyrlyk ýörelgelerini hem-de dünýä lukmançylygynyň häzirki zaman ösüşlerini özünde jemleýän özboluşly milli saglygy goraýyş ulgamynyň döredilmeginiň gözbaşynda durmak bilen, halkymyzyň jan saglygyny hemme zatdan ilerde tutýar, ony goramaga uly üns berýär, bu ugurda ylmyny, zehinini, zähmetini gaýgyrmaýar. «Türkmenistanda saglygy goraýşy ösdürmegiň ylmy esaslary», «Türkmenistan — sagdynlygyň we ruhubelentligiň ýurdy», «Türkmenistanyň dermanlyk ösümlikleri», «Bagtyýarlyk saglykdan başlanýar» atly dürli ýyllarda halkymyza peşgeş eden kitaplary Milli Liderimiziň ata Watanymyza, mähriban halkymyza bolan çuňňur söýgüsiniň aýdyň alamatydyr.
Tanyşdyryş dabarasyna gatnaşyjylar halkyň saglygyna, sagdyn durmuş ýörelgesiniň ilerledilmegine hemişe aýratyn üns berýän Gahryman Arkadagymyza hem-de hormatly Prezidentimize hoşallyk sözlerini beýan etdiler.
Atamyrat ÝAZWELIÝEW, Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň III ýyl talyby.