LANÇŽOU UNIWERSITETINIŇ WEKILLERINIŇ ÝURDUMYZA SAPARY BAŞLANDY
2025-nji ýylyň 26-njy noýabrynda Türkmenistanyň Daşary işler ministrliginiň Halkara gatnaşyklary institutynda Lançžou uniwersitetiniň wekilleriniň gatnaşmagynda duşuşyklar geçirildi. Oňa Lançžou uniwersitetinden we institutymyzdan professor-mugallymlar, talyp ýaşlar gatnaşdylar. Duşuşyklar hytaý wekiliýetiniň 2025-nji ýylyň 25-30-njy noýabrynda ýurdumyza saparynyň çäklerinde geçirildi.
Myhmanlar üçin institut boýunça tanyşlyk gezelençleri geçirildi. Olar türkmen diplomatiýasynyň milli muzeýine, nemes kitaphanasyna aýlanyp gördiler. Gezelenç tamamlanandan soň hormatly myhmanlaryň gatnaşmagynda talyplar üçin okuw sapagy guraldy. Okuw sapagyny Lançžou uniwersitetiniň Türkmenistan boýunça barlag merkeziniň ýolbaşçysy Wang Sihai hem-de şol uniwersitetiň Halkara medeni alyş-çalyş institutynyň ýolbaşçysy Li Kunlin alyp bardy. Onda myhmanlar gadymyýetden gözbaş alyp gaýdýan türkmen-hytaý gatnaşyklarynyň taryhy ösüşi barada talyp ýaşlara gürrüň berdiler. Lançžou uniwersitetiniň gurluşy we ondaky bilim beriş ulgamy barada aýdylanlar duşuşyga gatnaşanlarda aýratyn täsir galdyrdy. Onuň ahyrynda talyp ýaşlar özlerini gyzyklandyran sowallara jogap aldylar.
Talyp ýaşlar bilen okuw sapagy tamamlanandan soň institutyň professor-mugallymlary bilen duşuşyk geçirildi. Onda hünärmenler bilim bermegiň döwrebap usullary, sanlylaşdyrmak we sanly tehnologiýalar ulgamynda dünýäniň öňdebaryjy tehnologiýalaryny peýdalanmak barada giňişleýin gürrüň berdiler.
Ýeri gelende bellesek, üstümizdäki ýylda Hormatly Prezidentimiziň Hytaý Halk Respublikasyna saparynyň çäklerinde türkmen wekiliýetiniň agzalarynyň hytaý tarapynyň wekilleri bilen ikitaraplaýyn duşuşyklary geçirilip, duşuşyklaryň netijeleri boýunça ikitaraplaýyn resminamalara gol çekilipdi. Şolaryň hatarynda Türkmenistanyň Daşary işler ministrliginiň Halkara gatnaşyklary instituty bilen Lançžou uniwersitetiniň arasynda özara düşünişmek hakynda Ähtnama hem gol çekilipdi.
Şeýle çäreleriň geçirilmegi türkmen-hytaý gatnaşyklarynyň täze derejä çykandygyny görkezýär we geljekki halkaraçy hünärmenler üçin hünär bilimini kämilleşdiriş sapaklary bolup hyzmat edýär.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.