Kuraş boýunça XIV dünýä çempionaty üstünliklere beslenýär
2023-nji ýylyň 23–28-nji noýabry aralygynda paýtagtymyzyň Olimpiýa şäherçesiniň Başa-baş söweş sungaty sport toplumynda Kuraş boýunça XIV dünýä çempionaty geçirildi.
Kuraş boýunça dünýä çempionatynyň ýokary derejede dowam edýän günlerinde biz hem Türkmenistanyň Daşary işler ministrliginiň Halkara gatnaşyklary institutynyň talyplary bolup tutluşyklara janköýerlik etmäge gatnaşdyk. XIV dünýä çemionatynyň ilkinji gününiň netijeleri boýunça türkmen türgenleri altyn medallaryň ikisine eýe boldular. Dinara Rozykulowa 57 kilograma çenli agram derejesinde, Mariýa Lohowa bolsa, 70 kg çenli agramda Dünýä çempiony diýen belent ada mynasyp boldular.
Erkekler ýygyndy toparymyzdan 100 kilogram agram derejesinde bäsleşen Ruslan Esgerow hem-de 100 kilogramdan ýokary agramda göreş düşekçesine çykan Sapa Sapaýew hormat münberiniň üçünji basgançagynda ornaşdylar. 57 kilograma çenli agram derejesinde çykyş eden Gülşat Annaýewa hem türkmen ýygyndysynyň bürünç medallarynyň üstüni ýetirdi. Netijede, türkmen türgenleri ýaryşyň ilkinji gününde 8 medala (2 altyn, 3 kümüş we 3 bürünç) eýe boldular.
Ýurdumyzyň türgenleri iri halkara ýaryşlara yzygiderli gatnaşyp, baýrakly orunlara, medallara eýe bolýarlar. Mälim bolşy ýaly, türkmen türgenleri halkara ýaryşlaryň 243-sine gatnaşyp, 190 altyn, 194 kümüş, 290 sany bürünç, umumylykda 674 medala mynasyp boldular. Bularyň ählisi sport ýurdy hökmünde Watanymyzyň abraý-mertebisiniň artýandygyna aýdyň şaýatlyk edýär.
Meýlis SADYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby.