KITAP – YNSAN AHLAGYNY TERBIÝELEÝJI, DÜNÝÄGARAÝŞYNY, GÖZÝETIMINI GIŇELDIJI, ZEHININI ÝITELDIJI GÜÝÇ
2023-nji ýylyň 4-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň, Türkmenistanyň Medeniýet ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde guramagynda kitabyň jemgyýetimizdäki ornuny giňden wagyz etmek maksady bilen döredijilik duşuşygy geçirildi. Duşuşyga Türkmenistanyň Döwlet çeperçilik akademiýasynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Maýa Kulyýewa adyndaky türkmen milli konserwatoriýasynyň, Türkmen döwlet binagärlik we gurluşyk institutynyň, Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary gatnaşdylar.
Döredijilik duşuşygyň dowamynda Türkmenistanyň Daşary işler ministrliginiň Halkara gatnaşyklary institutynyň mugallymlary, Türkmenistanyň Magtymguly adyndaky Ýaşlar guramasynyň Merkezi Geňeşiniň wekilleri çykyş etdiler. Olar öz çykyşlarynda ynsan ömründe kitabyň tutýan orny, kitap okamagyň peýdasy, okamagyň, has dogrusy çuňňur many-mazmunly kitaplaryň durmuşymyza, bagtly geljegimize ýetirýän täsiri, ýaşlary watançylyk ruhunda terbiýelemekde Gahryman Arkadagymyzyň pähim-paýhasynyň miwesi bolan ajaýyp kitaplaryň ähmiýeti barada gürrüň berdiler. Milli Liderimiziň sargytlary, öwüt-ündewleri bagtyýar nesiller üçin ýol-ýörelgedir. Hormatly Arkadagymyzyň kitaplary ýaş nesle kämil bilim-terbiýe bermekde, olaryň Watana söýgüsini artdyrmakda gymmatly gollanmadyr diýip, çykyş edenler aýratyn nygtadylar.
Şeýle-de döredijilik duşuşygyň dowamynda sorag-jogaply gysga möhletli bäsleşik hem gurnaldy. Onda ýeňiji bolan talyplara Türkmenistanyň Magtymguly adyndaky Ýaşlar guramasynyň Aşgabat şäher Geňeşiniň ýadygärlik sowgatlary gowşuryldy. Döredijilik duşuşygynyň kitap sergisi we ýarmarkasy bilen sazlaşykly utgaşdyrylmasy çäräniň täsirini has-da artdyrdy.
Döredijilik duşuşygyň ahyrynda oňa gatnaşyjylar “Arkadag Serdarlyk bagtyýar ýaşlar” ýylymyzda ýaş nesilleriň arasynda ykdysadyýetimiz bilen bir hatarda sazlaşykly ösýän milli medeniýetimiz we sungatymyz, şeýle-de ruhy gymmatlyklarymyzyň genji-hazynasy bolan kitaphanalarda alnyp barylýan işler hakynda tanyşmak, ýaşlarda kitaba bolan söýgüni güýçlendirmek, Gahryman Arkadagymyzyň jöwher paýhasyndan syzylyp çykan kitaplarynyň üsti bilen watançylyk duýgularyny, milli mirasa sarpany, zähmete söýgüni döretmek maksady bilen döredilýän mümkinçilikler üçin Türkmen halkynyň Milli Liderine, hormatly Prezidentimize alkyş sözlerini aýtdylar.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
žurnalistikanyň
nazaryýeti we amalyýeti
kafedrasynyň mugallymy.
Şeýle hem bu barada şu ýerden okap bilersiňiz.
https://turkmenportal.com/tm/blog/61374