Kiberhowpsuzlygy boýunça onlaýn seminar
2023-nji ýylyň 3-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Telekommunikasiýalar we informatika institutynyň binýadynda döredilen Kiberhowpsuzlyk ugry boýunça öňdebaryjy tejribe merkeziniň guramagynda onlaýn seminar geçirildi.
Seminaryň dowamynda Türkmenistanyň Telekommunikasiýalar we informatika institutynyň mugallymlary Nurguly Saryýew “Gowşaklyklary ýüze çykarmak we olary aradan aýyrmak”, Maksat Myradow “Sosial inženerçilik usullary, olara garşy çäreleri görmek”, Şaberdi Gylyçtaganow “Kiberhowpsuzlyk boýunça talaplaryň seljermesi” we Nazym Maksadow “Kiber hüjümleriň analizi we olara garşy göreş usullary” diýen temalarda çykyş etdiler. Olaryň aýtmaklaryna görä, kiberhowpsuzlyk boýunça ýurdumyzda alnyp barylýan döwrebap işler özleriniň oňyn netijelerini berýär.
Onlaýn seminara gatnaşan talyplar mugallymlara özlerini gyzyklandyrýan sowallar bilen ýüzlenip, olara anyk jogaplary aldylar.
Gülöwser REJEPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.