28/02/2024
1013
Katar duşuşyklary: bilim gatnaşyklarynyň täze sahypasy
Ylym-bilim ulgamynyň döwletimiziň diňe bir içeri syýasatynda däl-de, eýsem, daşary syýasy gatnaşyklarynda hem iň bir ileri tutulýan ugurlaryň hatarynda durýandygyny Türkmenistanyň bilim ministri B.Orazdurdyýewanyň ýolbaşçylygyndaky türkmen wekiliýetiniň Katar Döwletine iş sapary hem nobatdaky gezek subut edýär. 2024-nji ýylyň 27-nji fewralynda geçirilen duşuşyklar bolsa degişli ugurdaky hyzmatdaşlygyň gerimini mundan beýläk-de giňeltmekde möhüm çelgi bolar.
Günüň birinji ýarymynda türkmen wekiliýetiniň Doha uniwersitetiniň rektory Salem Al Nuaimi bilen duşuşygy boldy. Ýokary derejede geçirilen duşuşykda ikitaraplaýyn hyzmatdaşlygy we ylmy gatnaşyklary pugtalandyrmak meselesine aýratyn üns berildi. Şeýle hem bu babatda işjeň hyzmatdaşlygy täze derejelere çykarmak bilen bagly teklipler hödürlenildi we käbir meseleler ara alnyp maslahatlaşyldy.
Günüň ikinji ýarymynda türkmen wekiliýetiniň Lusail uniwersitetiniň ýolbaşçy düzümi bilen duşuşygy hem netijeliligi bilen tapawutlandy. Uniwersitetiň direktory jenap Nitham Hindi bilen geçirilen duşuşykda Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew bilim ulgamyndaky türkmen-katar hyzmatdaşlygy barada nygtap, iki döwletiň bilim ulgamyndaky hyzmatdaşlygyň hukuk binýady dogrusynda aýratyn durup geçdi. Bellenilişi ýaly, Häzirki wagtda Türkmenistanyň ýokary okuw mekdepleriniň üçüsinde, ýagny Döwletmämmet Azady adyndaky Türkmen milli dünýä dilleri institutynda, Magtymguly adyndaky Türkmen döwlet uniwersitetinde hem-de Türkmenistanyň Daşary işler ministrliginiň Halkara gatnaşyklary institutynda arap dili ders hökmünde geçilip, olarda 150-den gowrak talyp bu dili öwrenýär. Şeýle-de ýurdumyz boýunça daşary ýurt dillerine ýöriteleşdirilen 6 sany orta mekdepde 4,5 müňden gowrak okuwça arap dili öwredilýär.
Duşuşygyň dowamynda Lusail uniwersitetiniň tejribesini öwrenip, Türkmenistanyň ýokary okuw mekdepleriniň bu ýokary okuw mekdebi bilen birnäçe ugurlar boýunça hyzmatdaşlygyny ýola goýmak üçin türkmen wekiliýeti tarapyndan birnäçe teklipler hödürlendi. Bu ýokary ylym ojagynyň Türkmenistanda şahamçasyny açmak meselesi bilen bagly teklipler häzirki döwrüň möhüm talaplaryndan ugur alýandygy bilen ähmiýetlidir. Biragyzdan oňlanan bu başlangyç geljekde ýokary derejeli halkara hünärmenleriň taýýarlanmagynda düýpli esas bolup hyzmat eder. Şeýle hem katar tarapy Türkmen döwlet ykdysadyýet we dolandyryş instituty bilen hyzmatdaşlyga ýokary gyzyklanma bildirdiler.
Türkmen-katar ylym-bilim gatnaşyklarynyň ösüşinde we ýokary derejeli hünärmenleri taýýarlamak boýunça hyzmatdaşlygy amala aşyrmakda şu gezekki duşuşyklar möhüm ähmiýete eýedir.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.