KÄMILLIGIŇ ÝOLUNDA
2022-nji ýylyň 22-nji aprelinde Türkmenistanyň Daşary işler ministrliginiň Halkara gatnaşyklary institutynda «Açyk gapylar» güni mynasybetli ýurdumyzyň orta mekdepleriniň okuwçylary, şeýle hem esgerleri, önümçilikde zähmet çekýän ýaşlary we institutymyzda okamaga isleg bildirýän raýatlary üçin tanyşdyrylyş çäresi guraldy. Bu çäräniň çäginde institutda zähmet çekýän tejribeli žurnalistleriň gatnaşmagynda Ýaş diplomatlaryň mekdebiniň agzalary üçin «Žurnalistikada kämillige ýetmegiň ýollary» temasy boýunça okuw sapagy geçirildi.
Sapagyň dowamynda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň mugallymlary çykyş etdiler. Çykyşlarda žurnalistikada kämillige ýetmek üçin gerekli bolan zatlar barada gürrüň edildi. Mundan başga-da, her bir žurnalistiň özünde kemala getirmeli ukyp-başarnyklary hakynda aýdylyp geçildi. Sapagyň dowamynda Ýaş diplomatlaryň mekdebiniň agzalary mugallymlara žurnalistika ugrundan gyzyklanýan soraglaryny berip, olar hakynda giňişleýin maglumat aldylar.
Humaý Meredowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy hünäriniň I ýyl talyby.