ILÇINIŇ GATNAŞMAGYNDA UMUMY SAPAK GEÇIRILDI
2026-njy ýylyň 23-nji ýanwarynda Türkmenistanyň Daşary işler ministrliginiň Halkara gatnaşyklary institutynda Çad Respublikasynyň Türkmenistanda täze bellenen Adatdan daşary we Doly ygtyýarly ilçisi (oturýan ýeri Moskwa ş.) Mahamud Adam Beşiriň gatnaşmagynda umumy sapak geçirildi. Oňa institutymyzyň professor-mugallymlary we talyp ýaşlary gatnaşdylar.
Umumy sapagyň barşynda ilçi Türkmenistanyň parahatçylyk söýüjilikli syýasatyna we hemişelik Bitaraplyk hukuk ýagdaýyna ýokary baha berip, Türkmenistanda diplomatik missiýasyna başlamagyň özi üçin uly mertebedigini belledi. Ol çykyşynda häzirki zaman dünýäsinde diplomatiýanyň tutýan ornuna, sebitara hyzmatdaşlygyň ähmiýetine we Afrika yklymy bilen Merkezi Aziýanyň arasyndaky meňzeşliklere aýratyn üns çekdi. Diplomatyň Çad Respublikasynyň taryhy, medeniýeti, ykdysady mümkinçilikleri we bilim ulgamy barada beren giňişleýin maglumatlary talyp ýaşlarda gyzyklanma döretdi.
Bilşimiz ýaly, Türkmenistan bilen Çad Respublikasynyň arasyndaky diplomatik gatnaşyklar 1994-nji ýylyň 10-njy oktýabrynda ýola goýlandyr. Şol döwürden bäri döwletler ikitaraplaýyn diplomatiýanyň çäginde işjeň hyzmatdaşlyk alyp barýarlar. Çad Respublikasy Türkmenistanyň Bitaraplyk syýasatyny we halkara parahatçylyk başlangyçlaryny hemişe goldap gelýän ýurtlaryň biridir.
Umumy sapagyň ahyrynda talyp ýaşlar özlerini gyzyklandyran sowallara jogap aldylar. Bu duşuşyk talyplar üçin diňe bir täze maglumatlar çeşmesi bolman, eýsem, diplomatiýanyň inçe tärlerini tejribeli diplomatdan öwrenmek üçin uly mümkinçilik boldy.
Umumy sapak tamamlanandan soň hormatly myhman institutymyzda hereket etýän türkmen diplomatiýasynyň milli muzeýine we “Parahatçylyk medeniýeti” atly ÝUNESKO klubyna aýlanyp gördi.
Rejepguly MAŞADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.