ILÇI BILEN GEÇIRILEN TÄSIRLI OKUW SAPAGY
2024-nji ýylyň 14-nji noýabrynda türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynda Malaýziýanyň Türkmenistandaky Adatdan daşary we Doly ygtyýarly ilçisi Mohd Suhaimi bin Ahmad Tajuddiniň gatnaşmagynda 2025-nji ýylda Malaýziýanyň ASEAN-da Başlyklyk etmegine bagyşlanan tema boýunça okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň rektory, professor-mugallymlary we talyp ýaşlary gatnaşdylar.
Okuw sapagynyň başynda hormatly Ilçi Türkmenistan bilen Malaýziýanyň arasyndaky syýasy-diplomatik, söwda-ykdysady, medeni-ynsanperwer ugurlar boýunça ýetilen sepgitler we durmuşa geçirilen işler barada, şeýle hem häzirki wagtda Malaýziýanyň ASEAN bilen alyp barýan hyzmatdaşlygy barada giňişleýin gürrüň berdi.
Mälim bolşy ýaly, Malaýziýa Aziýa-Ýuwaş umman sebitinde Türkmenistanyň esasy hyzmatdaşlarynyň biridir. Şonuň üçin hem, şeýle duşuşyklaryň yzygiderli geçirilmegi, geljekki halkaraçy hünärmenlere ýurdumyzyň hyzmatdaş döwletini içgin öwrenmäge giň mümkinçilikler döredýär.
Täsirli geçen okuw sapagynyň ahyrynda institutyň talyplary hormatly Ilçä özlerini gyzyklandyrýan sowallary berdiler.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.