Ilçi bilen geçirilen duşuşyk
2025-nji ýylyň 12-nji fewralynda Türkmenistanyň Daşary işler ministrliginiň Halkara gatnaşyklary institutynda Gwatemala Respublikasynyň Türkmenistana täze bellenilen Adatdan daşary we Doly ygtyýarly ilçisi Eduardo Enrike Ernandes bilen duşuşyk geçirildi. Duşuşyga institutyň talyp ýaşlary gatnaşdylar.
Gwatemala Respublikasynyň ilçisi özüniň çykyşynda Gwatemala Respublikasynyň taryhy, onuň alyp barýan daşary syýasaty we uzak geljegi nazarlaýan bu dostlukly döwlet bilen Türkmenistan ýurdumyzyň arasynda alnyp barylýan hoşniýetli gatnaşyklar we onuň esasy ugurlary, şol sanda bu gatnaşyklary giňeltmekde alnyp barylýan işler dogrusynda gürrüň berdi.
Türkmenistan döwletimiziň Gwatemala Respublikasy bilen diplomatik gatnaşyklary 1996-njy ýylyň 22-nji awgustynda ýola goýlupdy. Iki halkyň arasynda alnyp barylýan hoşniýetli gatnaşyklar gün-günden ösýär. Türkmenistan Gwatemala Respublikasy bilen dünýäniň iň abraýly halkara guramasy bolan Birleşen Milletler Guramasynyň çäklerinde gatnaşyklaryny has-da giňeldýär.
Bu duşuşygyň geçirilmegi türkmen diplomatiýasynyň milli mekdebinde bilim alýan ýaş halkaraçy hünärmenleriniň halkara gatnaşyklary ulgamynda bilimlerini has-da artdyrmaga ýardam etdi.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
III ýyl talyby.