HYTAÝDA “OWGANYSTANYŇ TÄZE ÝAGDAÝYNDA MERKEZI AZIÝANYŇ HOWPSUZLYGY WE ÖSÜŞI” ATLY FORUM GEÇIRILDI
2021-nji ýylyň 19-njy noýabrynda Hytaý halk Respublikasynyň paýtagty Pekin şäherinde HJYA-nyň ýokary derejeli seljeriş merkezleriniň Geňeşiniň sekretariatynyň we Russiýany, Gündogar Ýewropany we Merkezi Aziýany öwrenmek boýunça Ählihytaý Assosiasiýasynyň guramagynda Hytaý jemgyýetçilik ylymlar akademiýasynyň (HJYA) konsultatiw guramasynyň gatnaşmagynda Hytaýyň seljeriş merkezleriniň we Merkezi Aziýa döwletleriniň “bäşliginiň” arasynda “Owganystanyň täze ýagdaýynda Merkezi Aziýanyň howpsuzlygy we ösüşi” atly forum geçirildi.
Forumda HJYA-nyň Russiýa,Gündogar Ýewropa we Merkezi Aziýa Institutynyň, Gazagystan Respublikasynyň Prezidentiniň ýanyndaky strategik gözlegler institutynyň, Türkmenistanyň Daşary işler ministrliginiň Halkara gatnaşyklary institutynyň, Owganystan Respublikasynyň Prezidentiniň ýanyndaky strategik we sebitara gözlegler institutynyň wekilleri çykyş etdiler.
Forumyň dowamynda Türkmenistanyň Daşary işler ministrliginiň Halkara gatnaşyklary instituty Türkmenistan döwletimiziň adyndan wekilçilik edip, institutyň okuw işleri boýunça prorektory Gülşat Ýusupowa “Türkmenistan-Owganystan:ynsanperwer gatnaşyklar esasynda hoşniýetli goňşuçylyk” atly temada çykyş etdi.
Prorektor öz çykyşynda Türkmenistanyň Prezidenti Gurbanguly Berdimuhamedowyň ýolbaşçylygynda daşary syýasaty ösdürmek ugrunyň yzygiderli durmuşa geçirilmegi netijesinde, Türkmenistanyň diňe bir milli derejede däl, eýsem sebitara hem-de halkara ölçeglerinde uly ösüşleri gazanandygyny aýratyn belläp geçdi. Şeýle-de ol: “Ata-babalarymyzdan miras galan hoşniýetli goňşuçylyk däplerine, birek-birege hormat goýmak, deňhukuklylyk we milli bähbitleri goramak ýörelgelerine eýerip, ýurdumyz özüni ygtybarly hyzmatdaş hökmünde görkezip, sebitiň we dünýäniň ähli döwletleri bilen netijeli we özara peýdaly gatnaşyklary saklaýar.
Sebitiň döwletleri bilen hyzmatdaşlygy ösdürmek arkaly Türkmenistan özüniň ýakyn goňşusy Owganystan bilen-de doganlyk gatnaşyklaryny berkidýär we goňşy döwletde durnuklylygyň ýola goýulmagynyň Merkezi Aziýa sebitinde, şeýle-de bütin dünýäde parahatçylygy we howpsuzlygy gorap saklamagyň gaýragoýulmasyz şerti hökmünde garap, bu hyzmatdaşlyga uly ähmiýet berýär.
BMG-niň sessiýalarynda we beýleki halkara wekilçilikli forumlarda biziň ýurdumyz Milletler Geňeşiniň bu ýurt üçin BMG-niň halkara ykdysady we maliýe goldawyny artdyrmak baradaky kararlaryny goldap, birnäçe gezek anyk teklipler bilen çykyş etdi. Şeýle-de, biziň ýurdumyz BMG-niň howandarlygynda Owganystany dikeltmek boýunça uzakmöhletleýin maksatnamany işläp düzmegiň wajyplygy baradaky başlangyçlary öňe sürdi” diýmek bilen hormatly Prezidentimiziň alyp barýan ynsanperwer syýasatynyň netijesinde doganlyk Owganystan döwletine yzygiderli ynsanperwerlik kömegini berýändigini belledi. Bu aksiýalaryň owgan halkynda ýakyn dostuna ynanyşmak duýgusyny oýarýandygyny hem-de olaryň bu kömegi we goldawy üçin türkmen halkyna hem-de onuň Milli Liderine çuňňur minnetdarlyk bildirýändiklerini aýdyp, anyk maglumatlar esasynda çykyş etdi.
Institutyň prorektory özüniň çykyşynyň ahyrynda Türkmenistanyň Prezidentiniň: “...Türkmen tarapynyň Owganystanda parahatçylygyň, ylalaşygyň hem-de bitewüligiň tizden-tiz berkarar bolmagy üçin degişli gatnaşyklaryň ýola goýulmagyna, zerur şertleriň döredilmegine goňşy we bitarap döwlet hökmünde goldaw bermäge taýýar...” diýen sözlerini getirmek bilen, geljekde Merkezi Aziýa sebitinde ýagdaýyň durnuklaşmagyna we onuň geljekki ösüşine oňyn täsir etjek Owganystanda durnukly parahatçylygyň saklanylmagy bilen türkmen tarapynyň gyzyklanýandygyny ýene bir gezek subut edýändigini aýdyp, sözüni jemledi.
Aýgül MEREDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.