Hytaý diliniň dünýäsi
2022-nji ýylyň 21-nji aprelinde Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» gurnagynyň guramagynda institutyň talyplarynyň gatnaşmagynda Türkmenistan bilen Hytaý Halk Respublikasynyň arasynda diplomatik gatnaşyklaryň ýola goýulmagynyň 30 ýyllygy, şeýle-de Birleşen Milletler Guramasynyň senenamasyndaky hytaý diliniň halkara güni, buýsanjymyz bolan bedew baýramçylygy mynasybetli döredijilik duşuşygy geçirildi.
Duşuşygyň dowamynda institutymyzyň talyplarynyň hytaý medeniýeti we dili barada taýýarlan prezentasiýalarynyň çykyşlary, bedew hakynda hytaý dilindäki goşgular diňlenildi. Hytaý dilinde ýerine ýetirlen aýdym bolsa duşuşygyň täsirligini has-da artdyrdy. Bu döredijilik duşuşygynyň geçirilmegi, hytaý diline bolan höwesi, dilde geplemek endikleriniň artmagyna özboluşly ýardam etdi.
Çünki, diplomatiýanyň milli mekdebinde bilim alýan talyplar üçin şeýle mümkinçilikler olaryň döredijilik dünýäsiniň täze taraplaryny açýar. Olar diňe dil öwrenmek bilen çäklenmän, eýsem şol ýurdyň taryhy we medeniýeti bilen içgin tanyşýarlar. Bu bolsa geljekki öz ugrunda zähmet çekjek ýaşlarymyzyň ukyp-başarnygyny ýokarlandyrýar.
Mähriban GELENOWA,
Türkmenistanyň Daşary işleri ministrliginiň
Halkara gatnaşyklary institutynyň uly mugallymy.