Hoş habar! ÝUNESKO we türkmen saz guraly - Dutar
Türkmeniň buýsanjy dutar ýasamak senetçiliginiň, dutarda saz çalmak we bagşyçylyk sungatynyň Birleşen Milletler Guramasynyň Bilim, ylym we medeniýet boýunça edarasy bolan ÝUNESKO-nyň Adamzadyň maddy däl medeni mirasynyň sanawyna girizilmegi baradaky hoş habary eşidip, nädip, buýsanman durup boljak. Bilişimiz ýaly, türkmen halkynyñ aýdym-saz dünýäsinde dutar iñ ýörgünli saz gurallaryñ biridir. Dutar, saz gural hökmünde, orta Aziýada dürli halklaryñ arasynda, ýörgünli gural bolup, her halkyň öz dialektine görä atlandyrylýar. Bu saz guraly özbek, garagalpak, gyrgyz, uýgur we başga-da birnäçe halklarda bolup, olar biri-birilerinden ululygy, görnüşi, hat-da kirişleri boýunça hem tapawutlanýarlar. Dutar türkmeniň sungat dünýäsinde, halk sungatyñ ösmeginde uly orun eýeleýän saz gurallaryň biridir. Eger-de türkmeniň taryhyna we edebiýatyna göz aýlasaň, dutar türkmen halkynyñ milli duýgusynyñ guraly bolandygyny görýärsiň. Ol ýüreklerde ýañlanyp, türkmen halkynyň guwançly we buýsançly durmuş hekaýasyny, şahyrlaryñ paýhasly goşgularyny, owadan çeperçilik bilen bize beýan edip bilen gudratdyr. Türkmen halky özüniň saz dünýäsinde, durmuşymyzyñ taryhy wakalaryny suratlandyryp, owadan we bagtly durmuşymyzy görkezip, halkymyzyň özboluşly häsiýetini we jebisligini saz bilen dünýä özüni jar edip, wasp edip bilen beýik halkdyr.
Çemen BAÝRYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy