HGI-niň uçurym ýyl talyplarynyň ýadygärlik bag ekmek dabarasy
2023-nji ýylyň 25-nji noýabrynda Türkmenistanyň Daşary işler
ministrliginiň Halkara gatnaşyklary institutynyň çäginde ýadygärlik bag ekmek
dabarasy geçirildi. Oňa institutyň uçurym ýyl talyplary gatnaşdylar.
Häzirki wagtda ýurdumyzy bagy-bossanlyga öwürmek, ekologiýa
abadançylygyny gorap saklamak babatda uly işler durmuşa geçirilýär. Hormatly
Prezidentimiziň badalga bermegi bilen, ýaz we güýz aýlarynda ählihalk bag ekmek
dabarasy geçirilýär. Ata-babalarymyz her bir işiň başyny tutanlarynda, şol işiň
tebigat, jemgyýet hem-de şahsy durmuş bilen baglanyşykly peýdaly taraplaryny
göz öňünde tutupdyrlar, şeýle-de bu başy tutulýan işiň ýaşlaryň arasynda zähmet
babatda terbiýeçilik ähmiýetini hökmany suratda nazara alypdyrlar. Töwerek-
daşyňy bagy-bossanlyga öwürmäge ýaşaýşyň ähli döwürlerinde borç hökmünde
garalypdyr. Asyrlaryň dowamynda adamlar tebigy baýlyklar bilen sazlaşykda
bolup, ondan rejeli peýdalanypdyrlar we bag ekmegi sogap iş hasaplapdyrlar.
Ýurdumyzyň durmuşa geçirýän daşary syýasy strategiýasynda halkara
guramalar bilen netijeli hyzmatdaşlygy ösdürmäge uly ähmiýet berilýär.
Şunuň bilen baglylykda, ählumumy gün tertibiniň strategik meseleleriniň,
hususan-da, howanyň üýtgemegine degişli meseleleriň çözgütlerini işläp
taýýarlamakda hyzmatdaşlygy pugtalandyrmak boýunça maksadalaýyk
çäreler durmuşa geçirilýär. Mälim bolşy ýaly, 30-njy noýabry — 12-nji dekabry
aralygynda Birleşen Arap Emirlikleriniň Dubaý şäherinde geçiriljek BMG-niň
Howanyň üýtgemegi baradaky Çarçuwaly konwensiýasyna gatnaşyjy taraplaryň
28-nji maslahatyna (COP-28) Türkmenistanyň wekiliýetiniň gatnaşmagyna
taýýarlyk görülýän günlerde institutyň çäginde alnyp barlan ýadygärlik bag ekmek
dabarasy hem özboluşly waka öwrüldi. Bu waka gözel Diýarymyzyň ekologiýa
abadançylygy üçin mynasyp goşant boljakdygy ikuçsuzdyr. Ýadygärlik bag ekmek
dabarasyna gatnaşan talypdyr mugallymlar bu wakanyň özlerinde uly täsir
galdyrandygyny buýsanç bilen bellediler.
Selbi GULMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.