Hazar ykdysady forumynyň mümkinçiliklerine bagyşlanan maslahat
2022-nji ýylyň 9-njy noýabrynda Türkmenistanyň Daşary işler ministrliginiň Halkara gatnaşyklary institutynda Hazar ykdysady forumynyň mümkinçiliklerine bagyşlanan maslahat geçirildi. Türkmenistanyň Senagatçylar we telekeçiler birleşmesi we institutyň Halkara ykdysady gatnaşyklary fakulteti tarapyndan guralan bu maslahata ýurdumyzyň telekeçilik ulgamynyň wekilleri, “Ýaş ykdysatçylar” ylmy gurnagynyň agzalary, ýokary okuw mekdebimiziň mugallymlary gatnaşdylar.
Maslahatda “Degirmen topary” hojalyk jemgyýetiniň direktory, Türkmenistanyň Senagatçylar we telekeçiler partiýasynyň Aşgabat şäher komitetiniň agzasy Baýram Amanmyradow çykyş etdi. Ol Berkarar döwletiň täze eýýamynyň Galkynyşy döwründe hormatly Prezidentimiziň hususy pudagy ösdürmek babatda alyp barýan syýasatynyň üstünlikli durmuşa geçirilmegi netijesinde ýurdumyzda telekeçilik ulgamynyň belent sepgitlere çykandygyny nygtady.
Şeýle hem, çykyş edenler 2022-nji ýylyň oktýabr aýynda Russiýa Federasiýasynyň Moskwa şäherinde geçirilen ikinji Hazar ykdysady forumynyň çäklerinde döwletleriň arasynda işewürligi goldamak we ösdürmek boýunça giň mümkinçilikleriň döredilendigini bellediler.
Maslahatda tejribe alyşmakda we göni işewürlik gatnaşyklaryny ýola goýmakda, bilelikdäki duşuşyklaryň, ylmy-amaly maslahatlaryň we beýleki çäreleriň geçirilmeginiň uly ähmiýetiniň bardygy aýdyldy.
Maslahata gatnaşyjylar telekeçilik işine ýaşlary giňden çekmekde döredip berýän giň mümkinçilikleri üçin hormatly Prezidentimize alkyş sözlerini aýtdylar.
Şeker BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň 2-nji ýyl talyby.