HAZAR DEŇZINIŇ DEŇIZ GURŞAWYNY GORAMAK BOÝUNÇA ÇARÇUWALY KONWENSIÝASY BABATYNDA OKUW SAPAGY
2023-nji ýylyň 2-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň Suw diplomatiýasy ugrunyň guramagynda talyp ýaşlaryň gatnaşmagynda Hazar deňziniň deňiz gurşawyny goramak boýunça Çarçuwaly konwensiýasynyň (Tähran Konwensiýasy) kabul edilmeginiň 20 ýyllygyna bagyşlanyp okuw sapagy geçirildi. Okuw sapagyny Türkmenistanyň Hazar deňzi institutynyň Maglumat howpsuzlygy we seljeriş müdirliginiň başlygynyň orunbasary Gülşirin Çarygulyýewa alyp bardy.
Tähran Konwensiýasyna 2003-nji ýylyň noýabr aýynda gol çekilip, konwensiýa 2006-njy ýylyň 12-nji awgustynda güýje girdi we şunuň bilen baglanyşykly her ýylyň 12-nji awgusty Hazar deňziniň güni hökmünde bellenilýär. Bu Konwensiýanyň çäginde Nebit dökülmelerine garşy göreşmek boýunça (Aktau teswirnamasy), Ýerasty çeşmelerden gelýän hapalanmalardan goramak boýunça (Moskwa teswirnamasy), Biologiki köpdürliligiň goralyp saklanmagy boýunça (Aşgabat teswirnamasy) we Serhetüsti daşky gurşawa ýetirilýän täsire baha bermek ýaly dört sany Teswirnama kabul edildi. Türkmenistanyň Hazar deňzi institutynyň wekili G.Çarygulyýewa agzalan Teswirnamalaryň hersini aýratynlykda giňişleýin düşündirdi. Şeýle hem okuw sapagynyň dowamynda häzirki wagta ýurdumyzda alnyp barylýan çäreleriň döwletimiziň köpugurly ekologiýa syýasatynyň giňden wagyz edilmegine, halkara hyzmatdaşlygynyň hemmetaraplaýyn berkidilmegine we giňeldilmegine, ekologiýa ulgamynyň, iri suw howdanynyň biologik köpdürliliginiň we baýlyklarynyň saklanmagynyň hem-de ygtybarly goralmagynyň bähbidine tutuş dünýä jemgyýetçiliginiň tagallalarynyň utgaşdyrylmagyna gönükdirilýändigi hem bellenildi.
Talyplar üçin bu okuw sapagy örän täsirli bolup, okuw sapagynyň dowamynda talyplar özlerini gyzyklandyrýan sowallara jogap tapdylar.
Begmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.