HALYPA ŽURNALIST BILEN DUŞUŞYK
2026-njy ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynda Strategik barlaglar boýunça ylmy merkeziň uly ylmy işgäri, filologiýa ylymlarynyň kandidaty Bekdurdy Amansaryýew bilen döredijilik duşuşygy geçirildi. Oňa institutyň rektory Gülşat Ýusupowa, professor-mugallymlar we talyp ýaşlar gatnaşdylar. Döredijilik duşuşygy Gazagystanyň paýtagtynda Sebitleýin ekologiýa sammiti, «RES 2026 EXPO» sergisiniň çäklerinde geçirilen kinofestiwal dogrusynda, Aral deňziniň möhüm meseleleri we suw çeşmelerini tygşytly ulanmak boýunça häzirki zaman çözgütleri bilen tanyşdyrmak maksady bilen guraldy.
Duşuşygyň dowamynda halypa žurnalist Astanada geçirilen Sebitleýin ekologiýa sammitiniň (RES 2026 EXPO) çäklerinde “Astana Eco Film Festival” kinofestiwalynyň jemlerinde «Tomaşaçylaryň göwnünden turan iň oňat film» baýragynyň «Günüň we suwuň çagalary» atly dokumental filmine berlendigini buýsanç bilen aýtdy. Duşuşygyň dowamynda filmden bölekler görkezildi. Talyplar özlerini gyzyklandyrýan sowallara täsirli jogaplarydyr maslahatlary aldylar.
Duşuşygyň ahyrynda Bekdurdy Amansaryýewe gyzykly çykyşy hem-de maslahatlary üçin köp sagbolsun aýdyldy. Täsirli geçen duşuşyk talyp ýaşlaryň halkara media giňişliginde ekologik meseleleriniň şöhlelendirilişi barada düşünjelerini has-da baýlaşdyrmaga uly itergi berdi.
Ogulmaýsa ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby