564
Halypa žurnalist bilen döredijilik duşuşygy
2021-nji ýylyň 27-nji aprelinde Türkmenistanyň Daşary işler ministrliginiň Halkara gatnaşyklary institutynda žurnalist Bekdurdy Amansaryýewiň Halkara žurnalistikasy fakultetiniň talyplary bilen döredijilik duşuşygy geçdi. Ol Türkmenistanyň Prezidentiniň 2020-nji ýylyň 23-nji dekabrynda sanly wideoaragatnaşyk arkaly geçiren iş maslahatynda ýokary derejeli žurnalistleri taýýarlamaga aýratyn üns bermek barada beren tabşyryklaryny ýerine ýetirmek, şeýle hem halypa-şägirtlik ýörelgesine eýermek meselelerine bagyşlandy.
Halypa-şägirtlik duşuşygynyň barşynda žurnalist hormatly Prezidentimiziň içeri we daşary syýasatyny halkyň aňyna we kalbyna ýetirmekde habar beriş serişdeleriniň ähmiýeti, öz geçen döredijilik ýoly, žurnalist käriniň aýratynlyklary hem-de internet žurnalistikasynyň sanly ulgamy ösdürmekdäki ähmiýeti, syýasy kommunikasiýanyň we täze dörän žurnalistikanyň ugurlary barada ýaş halkaraçy žurnalistlere içgin gürrüň berdi. Soňra talyp ýaşlar halypa žurnaliste özlerini gyzyklandyrýan soraglary berdiler. Bekdurdy Amansaryýewiň beren täsirli gürrüňleri we maslahatlary talyplaryň žurnalistik kärine bolan höweslerini has-da artdyrdy.
Gurbanjemal ÖDEGURBANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.