494
Halkara žurnalistikasy: Halypa - şägirtlik ýörelgesi bilen
2021-nji ýylyň 21-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Prezidentiniň 2020-nji ýylyň 23-nji dekabrynda sanly wideoaragatnaşyk arkaly geçiren iş maslahatynda ýokary derejeli žurnalistleri taýýarlamaga aýratyn üns bermek, şeýle hem, žurnalistika babatda halypa-şägirt ýoluny ösdürmek barada beren tabşyryklaryny ýerine ýetirmek maksady bilen “Dünýä edebiýaty” žurnalynyň baş redaktory Rahmet Gylyjowyň gatnaşmagynda Halkara žurnalistikasy fakultetiniň talyplary bilen döredijilik amaly sapak geçirildi.
Amaly sapagyň dowamynda oňa gatnaşyjylar ýaş žurnalistleriň watançylyk, ahlaklylyk ruhunda terbiýelenip, başarjaň žurnalistler bolup ýetişmelidigi, şeýle hem olaryň ösen kompýuter tehnologiýalaryndan hem-de sanly ulgamdan kämil baş çykarmagynyň zerurlylygy dogrusynda belläp geçdiler. Žurnalist Rahmet Gylyjow ýaş žurnalistlere habar üçin maglumat toplamak, habar çeşmeleri bilen işleşmegiň aýratynlyklary, täzelikleri, habarlary ýaýratmak arkaly ýurdumyzyň ösüşlerini, Hormatly Prezidentimiziň alyp barýan syýasatyny halkara habarlar giňişliginde şöhlelendirmekde alnyp barylýan işler barada gyzykly maglumatlary gürrüň berdi. Mundan başga-da, myhman žurnalistika babatda halypa-şägirtlik ýoluny ösdürmekligiň hem möhümdigini belledi. Amaly sapakda türkmen žurnalistikasynyň ösmeginde birnäçe işleri bitiren halypa žurnalistlerimiziň zähmet ýoluny çuňňur öwrenmek, şeýle hem ata-babalarymyzdan gelýän milli mirasymyzy gorap saklamak, ony baýlaşdyrmak we giňden wagyz etmek žurnalistika hünärinde bilim alýan her bir talybyň esasy maksady bolmalydygy nygtaldy. Şeýle hem, ussat terjimeçi bolan Rahmet Gylyjow şol ugur bilen gyzyklanýan talyplara edebi redaktirleme we terjime işiniň aýratynlyklary baradaky täsirli maglumatlary talyplar bilen paýlaşdy. Ol daşary ýurt eserlerini terjime etmekligiň hem-de olary edebi redaktirlemegiň aýratyn ussatlygy we tejribäni talap edýändigini belläp geçip, talyplara birnäçe terjime eserlerini yzygiderli okamaklygy maslahat berdi.
Şeýle-de, amaly sapaga gatnaşyjy talyplar gyzykly we maglumata baý çykyşyň dowamynda häzirki zaman dünýä tejribesinde žurnalistikanyň möhüm meseleleri barada özlerini gyzyklandyrýan soraglary bilen ýüzlendiler. Geljekki halkaraçy žurnalistler bolup ýetişjek talyplar üçin bu amaly sapak örän täsirli boldy.
Amaly sapagyň ahyrynda oňa gatnaşyjylar hormatly Prezidentimize döredilýän ahli mümkinçilikler üçin köp sagbolsun aýtdylar.
Egirjäýewa Gurbanjemal
Türkmenistanyň Daşary işler ministrliginiň Halkara gatnaşyklary institutynyň
Halkara žurnalistikasy fakultetiniň 2-nji ýyl talyby