HALKARA YNSANPERWERLIK HUKUGY BOÝUNÇA GEÇIRILEN HALKARA BÄSLEŞIGIŇ NETIJELERI JEMLENDI
Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň mugallymy Dürli Ballyýewa 2021-nji ýylyň oktýabr aýynda jemlenen Halkara Gyzyl Haç Komitetiniň guramagynda hünärmenleriň arasynda geçirilen “Halkara ynsanperwerlik hukugy we robotlar” atly düzme (esse) bäsleşiginde türkmen dilinde ýazylan işler boýunça 1-nji orna mynasyp boldy. Halkara Gyzyl Haç Komitetiniň Russiýa Federasiýasyndaky, Belarussiýadaky we Maldowadaky sebitleýin delegasiýasynyň bäsleşigine bütin dünýä ýüzünden 100-e golaý hünärmenler gatnaşdy. Bäsleşik azerbeýjan, ermeni, gazak, gyrgyz, rus, täjik, türkmen, özbek we ukrain dilleri boýunça geçirildi. Her bir dil boýunça ýazylan işlere aýratynlykda seredilip, mynasyp baha berildi.
Halkara ynsanperwerlik hukugy boýunça dürli derejedäki ylmy taýdan taýýarlyklykly gatnaşyjylar geçirilen ylmy barlaglaryň netijeleriniň ýokary hillidigini görkezdiler. Hukukçylar, orta we ýokary okuw mekdepleriniň mugallymlary, hünärmenler, žurnalistler, mekdep okuwçylary we talyp ýaşlar halkara ynsanperwerlik hukugy boýunça dürli meselelere öz ylmy garaýyşlaryny beýan etdiler.
Dürli Ballyýewa halkara ynsanperwer hukugy boýunça talyp ýaşlara birnäçe ýyldan bäri bilim berip gelýär we şonuň üçin-de bu bäsleşigiň temasy onuň üçin nätanyş ugur bolmandygyny belläp geçdi. Mundan başga-da, tejribeli mugallymyň Halkara Gyzyl Haç Komitetiniň Russiýa Federasiýasyndaky, Belarussiýadaky we Maldowadaky sebitleýin delegasiýasynyň halkara ynsanperwerlik hukugy boýunça geçirilýän F.F.Martensiň bäsleşigine Halkara gatnaşyklary institutynyň halkara hukugy hünäri boýunça bilim alýan talyplaryny taýýarlap gelýändigi, şeýle-de onuň ýurduň öňdebaryjy ýokary okuw jaýlarynyň arasynda halkara ynsanperwerlik hukugy boýunça birnäçe bäsleşikleri özüniň gurnaýandygy hem aýratyn bellenilmäge mynasypdyr.
HGHK web sahypasy, bäsleşigiň netijeleri:
https://www.icrc.org/ru/document/rezultaty-konkursa-esse-roboty-i-mgp
Aýna BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.