Halkara ulag maslahaty we sergisi öz işine başlady
2023-nji ýylyň 3-nji maýynda Türkmenistanyň Söwda-senagat edarasynyň binasynda ýurdumyzyň Ministrler Kabinetiniň ýanyndaky Ulag we kommunikasiýalar agentliginiň guramagynda «Halkara ulag-üstaşyr geçelgeleri: özara arabaglanyşyk we ösüş – 2023» atly halkara maslahaty we sergisi öz işine başlady. Bu halkara çärä ýurdumyzyň ministrlikleriniň, pudaklaýyn dolandyryş edaralarynyň hünärmenleri, ýokary okuw jaýlarynyň mugallymlary we talyp ýaşlary, milli we daşary ýurt köpçülikleýin habar beriş serişdeleriniň wekilleri, paýtagtymyzyň ýaşaýjylary gatnaşdylar.
Halkara forumyň açylyş dabarasynda Hormatly Prezidentimiziň iberen Gutlag haty bu ýere gelenlerde uly ruhubelentlik döretdi. Sergide «Vitol», «Meno Logistics», «Boeing», «Dragon Oil», «Fly Dubai», «Airbus», «Cargo Lux» ýaly halkara logistika we ekspeditorçylyk kompaniýalarynyň, Howa Ulaglarynyň Halkara Assosiasiýasynyň (IATA), Halkara gämiçilik edarasynyň (ICS), Halkara awtomobil ulaglary birleşiginiň (IRU), şeýle hem “Türkmenistanyň Ulag-logistika” merkeziniň, “Türkmen logistika” Assosiasiýasynyň wekilleriniň 800-den gowragy degişli diwarlyklarda ulag ulgamynyň ösüşini beýan edýän dürli eksponat gymmatlyklaryny görkezdiler. Sergide halkara ulag infrastrukturasynyň täze tehnologiýalary we önümleri, döwrebap hyzmatlary bilen tanyşmaga giň mümkinçilik döredi.
Halkara ulag maslahatynda “Halkara ulag we logistika: çagyryşlar we mümkinçilikler”, “Häzirki zaman ykdysadyýetiniň ulag-logistiki taýdan özara baglanyşygy”,”Söwdada we logistikada sanlylaşdyrma boýunça iň täze çemeleşmeler” ýaly ugurlar boýunça mejlisler geçirilip, olarda ulag ulgamynyň mundan beýläk-de osdürilmeginiň mümkinçilikleri babatda pikir alşyldy.
Halkara ulag-üstaşyr geçelgeleri: özara arabaglanyşyk we ösüş – 2023» atly halkara maslahaty we sergisi 4-nji maýda hem öz işini dowam eder.
Şeker BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby.