30/11/-0001
543
Halkara olimpiadada ýeňiji bolan talyplar sylaglandylar
Ýakynda Russiýa Federasiýasynyň müdirlikleriniň we ministrlikleriniň — Federal maliýe gözegçilik gullugynyň, Magaryf ministrliginiň, şeýle-de Ylym hem ýokary bilim ministrliginiň bilelikde guramagynda geçirilen Halkara maliýe howpsuzlygy olimpiadasynda Türkmenistanyň Daşary işler ministrliginiň Halkara gatnaşyklary institutynyň halkara gatnaşyklary fakultetiniň III ýyl talyby Baýnazar Nepesow «Halkara gatnaşyklary» ugry boýunça I orna mynasyp boldy. Şeýle hem, ýokary okuw mekdebiň Halkara gatnaşyklary fakultetiniň IV ýyl talyby Serdar Rahymow A.S.Puşkin adyndaky Döwlet rus dili instituty tarapyndan GDA giňişliginde rus dilini goldamak ugrundaky iň gowy taslama işleriň bäsleşiginde gatnaşyp, ýeňiji bolmagy başardy.
Şu ýylyň 4 — 6-njy noýabry aralygynda Polşa Respublikasynyň Katowiçe şäherinde matematika dersi boýunça geçirilen halkara olimpiadada hem türkmen talyplary üstünlikli çykyş edip, medallar çemenini bagladylar. Halkara toparlaýyn bäsleşigine (International Students Team Competition in Mathematics, ISTCiM-2022) Türkmenistanyň «Aşgabat» topary gatnaşyp, bürünç medala we III orna mynasyp boldy. Türkmenistanyň ýygyndy toparynyň kapitany Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň V ýyl talyby Akmyrat Tirkeşow ýekelikde kümüş medala we II orna mynasyp boldy.
14-nji noýabrda Türkmenistanyň Daşary işler ministrliginiň Halkara gatnaşyklary institutynda halkara bäsleşiklerde ýeňiji bolup, ýurdumyza üstünlik getiren institutymyzyň talyplaryny sylaglamak dabarasy geçirildi. Ýeňijilere ýokary okuw mekdebi tarapyndan Hormat hatlary, şeýle hem, «Aýdyň gijeler» hojalyk jemgyýetiniň önümi bolan telewizorlar hem-de gymmatbahaly sowgatlar gowşuryldy.
Talyp ýaşlarymyzyň gazanýan üstünlikleri bizi diýseň buýsandyrýar. Olara geljekki bäsleşiklerde hem uly üstünlikleriň hemra bolmagyny arzuw edýäris.
Ogulgurban ÇARYGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.