Halkara maslahatynyň bölümçesi geçirildi
2022-nji ýylyň 10-njy oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrligi, Türkmenistanyň Saglygy goraýyş we derman senagaty hem-de Türkmenistanyň Sport we ýaşlar syýasaty ministrlikleri tarapyndan geçirilýän “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara ylmy maslahatyň “Türkmenistanyň halkara gatnaşyklarynda lukmançylyk, bilim we sport başlangyçlarynyň dabaralanmagy” atly bölümçesi geçirildi. Oňa daşary ýurtly diplomatik gulluklaryň Türkmenistandaky wekilleri, dürli halkara guramalaryň wekilleri, ýurdumyzyň ministrliklerinden hem-de pudaklaýyn edaralaryndan wekiller, şeýle-de ýokary okuw mekdepleriniň mugallymlarydyr talyp ýaşlary gatnaşdylar.
Diýarymyzda hormatly Prezidentimiziň baştutanlygynda ynsan saglygy bahasyz baýlyk hasaplanylýar. Ýurdumyzda 10-njy oktýabrda giňden bellenilýän Türkmenistanyň Saglygy goraýyş we derman senagaty işgärleriniň güni mynasybetli “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara sergisi we ylmy maslahaty öz işine başlady. Bu sergä halkara guramalaryň hem-de daşary ýurtlaryň derman serişdelerini we lukmançylyk maksatly önümleri öndürmäge, lukmançylyk, sport enjamlaryny, bilim tehnologiýalaryny işläp taýýarlamaga ýöriteleşen kompaniýalaryň birnäçesiniň wekilleri şeýle-de, utgaşykly görnüşde geçiriljek ylmy maslahata dünýäniň ençeme döwletlerinden daşary ýurtlaryň esasy ýokary okuw mekdepleriniň alymlary, professorlary gatnaşdylar.
Sergä gatnaşyjylarda soňky ýyllarda ýurdumyzyň saglygy goraýyş, ylym, bilim ulgamlarynda gazanylan innowasion özgertmeler bilen tanyşdyrýan pawilýonlar hem dürli halkara guramalaryň guran powilýonlary ýakymly täsirleri galdyrdy.
Türkmenistanyň Daşary işler ministrliginiň Halkara gatnaşyklary institutynda halkara ylmy maslahatyň bölümçesiniň “Türkmenistanyň halkara gatnaşyklarynda lukmançylyk, bilim we sport başlangyçlarynyň dabaralanmagy” at bilen geçirilmegi hem-de onda ýurdumyzyň dürli ulgamlaryndadyr pudaklarynda zähmet çekýän hünärmenleriň, şeýle-de daşary ýurtly wekilleriň çykyş etmegi oňa gatnaşyjylary täzeçe ylmy gözleglere ruhlandyrdy. Geçirilen halkara maslahatynyň bölümçesiniň ahyrynda çykyş edenler ynsan saglygyny goramakda yhlasyny gaýgyrmaýan, ylma, bilime giň ýol açýan hormatly Prezidentimize tüýs ýürekden çykýan alkyş sözlerini beýan etdiler.
Aýnabat NAZAROWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.